Aqtóbelik turǵyn bir otbasy músheleri úshin zırattan oryn alyp qalmaq boldy
AQTÓBE. KAZINFORM – Muny senimgerlik basqarý kompanııasy dırektorynyń orynbasary aralaý kezinde baıqap qalǵan. Keıin beıit qurylysyn toqtatýdy talap etti.
Oqıǵa Aqtóbe qalasyndaǵy zırattardyń birinde boldy. Ulynan aıyrylǵan otbasy sol aýmaqty belgilep, ata-anasy men kelinine dep oryn daıyndaıdy. Ol úshin irgetasyn da quıyp bastaǵan. Aýmaqqa jaýapty «Financial World» JShS-i dırektorynyń orynbasary Anýar Kýjanov baqylaý, aralaý kezinde anyqtap, birden talapty túsindirdi.
- Bizdiń kompanııa 2022 jyly 45 zıratty senimgerlik basqarýǵa aldy. Kún saıyn aýmaqty qarap, baqylap júremiz, kútimin jasaımyz, qoqystan tazartamyz. Jaz aıynda munda turmystyq qaldyq tastap ketetin adamdar kóp. Túsindirý jumystaryn júrgizip, aldyn alamyz. Bul joly da solaı boldy. Men úlken aýmaqta jumys istep jatqan adamdardy kórip, kólikti toqtattym. Munda bir otbasynyń balasy jerlengen. Ári qaraı onyń ata-anasyna, tipti kelinine de oryn alyp qalǵysy kelip tur. Bul durys emes. Bizde erli-zaıyptynyń biri kóz jumsa, ekinshi oryndy qaldyrady. Bul qalypty jaǵdaı. Biraq bir áýletke oryn alyp qalýǵa bolmaıdy. Jer jetkilikti, ol úshin ýaıymǵa salynbaǵan jón,- dedi Anýar Kýjanov.
Aıta keteıik, elimizde ár adamǵa zırattan 6 sharshy metr jer tegin beriledi. Ekinshi adamǵa oryn alýǵa ruqsat bar. Qazirgi kezde Aqtóbe qalasyndaǵy zırattardyń kóbi tolyp, jabylyp jatyr. Sondyqtan qala ákimdigi taǵy 65 gektar jer bólindi. Senimgerlik basqarý kompanııasy bul jerge ınfraqurylym júrgiziledi.
Buǵan deıin Atyraýdaǵy zırattardyń birinde adam súıegi shashylyp jatqany týraly jazǵan edik. Bul jaǵdaı Atyraý oblysy Jylyoı aýdanyndaǵy Eski Qaraton eldi mekenindegi kóne zırattyń aýmaǵynda bolǵan. Aldyn ala málimetke sáıkes, atalǵan qorym HH ǵasyrdyń basyna tıesili.
