Aqtóbelik túlek UBT-da 137 ball jınady
AQTÓBE. KAZINFORM – Aqtóbe qalasyndaǵy M.Qurmanǵalıeva atyndaǵy №32 gımnazııasynyń túlegi Aıshat Saǵynaeva UBT kezinde 137 ball jınady. Bul ázirge elimizdegi úzdik ekinshi kórsetkish.
Mektep túlegi Altyn belgige úmitker. Ol 7 synyptan bastap osy gımnazııada bilim alady.
- UBT kezinde matematıka, ınformatıka pánderin tańdadym. Eńbektengen, oqyǵan balaǵa emtıhan, UBT sekildi synaq ońaı bolady dep oılaımyn. Ózim bul synaqqa 10 synyptan bastap daıyndaldym. Al 11 synypta bar kúshimdi saldym. Túrli kýrstarǵa qatystym ári mektep muǵalimderiniń de eńbegi zor. Buǵan deıin qańtar men naýryz aılarynda testileýge qatysyp, keıbir tapsyrmalardy qaıta oqyp, bilimimdi jetildirýge týra keldi, - dedi Aıshat Saǵynaeva.
Ol bolashaqta ІT mamany bolýdy armandaıdy. Oqý ornyn da tańdap qoıǵan.
- Men dıplom alǵan soń oblysyma, elime óz úlesimdi qosamyn dep oılaımyn. Bireýdiń izimen emes, óz qalaýymmen osy joldy tańdadym. Bul bolashaqtyń mamandyǵy dep oılaımyn. Sonymen birge maǵan túrli pikirsaıysqa qatysqan unaıdy. Respýblıkalyq týrnırge qatysyp, ekinshi oryn alǵanym bar, - dedi Aıshat Saǵynaeva.
Túlektiń synyp jetekshisi Gúlshat Bralovanyń aıtýynsha, ol jan-jaǵyna jıi kómektesip, qamqorlyq tanytyp júredi.
- Synyptastaryna únemi kómktesip júredi. Ol UBT-ǵa ózi daıyndaldy. Onlaın kýrstarǵa ǵana qatysty. Barlyq pándi qatar alyp júredi ári sabaqtan qalmaı, daıyndalyp keledi, - dedi ol.
Aıshat Saǵynaeva — ánshi Dımash Qudaıbergen bilim alǵan №32 gımnazııasynyń túlegi.
Aqtóbe oblystyq Bilim basqarmasynyń habarlaýynsha, 2023-2024 oqý jylynda 8 342 oqýshy UBT-ǵa qatysýǵa ótinish bildirgen.
Jalpy oblys boıynsha 11-synypty 9 236 oqýshy bitirdi. Onyń 489-y Altyn belgiden, 681-i Úzdik attestattan úmitti.
