Aqtóbelik stýdent jumbaq jaǵdaıda kóz jumdy
AQTÓBE. KAZINFORM – Aqtóbede joǵary oqý ornynyń belsendi stýdenti kóz jumdy. Qazirgi kezde Qylmystyq kodekstiń «Temirjol, áýe, teńiz nemese ózen kóligi júrisi nemese olardy paıdalaný qaýipsizdigi qaǵıdasyn buzý» baby boıynsha is qozǵaldy.
Oqıǵa 19 mamyr kúni tirkeldi.
Qazir Aqtóbe stantsııasyndaǵy jelilik polıtsııa bóliminde sotqa deıingi tergep-tekserý júrip jatyr.
— Sotqa deıingi tergep-tekserýdiń biryńǵaı tiziliminde QR Qylmystyq kodesiniń 344-baby 2-bóligi, ıaǵnı, abaısyzda adam ólimine ákep soqqan temirjol kóligi qozǵalysynyń qaýipsizdik qaǵıdasyn buzý deregi boıynsha is tirkeldi. Tergeý amaldary júrgizilip jatyr. Qazaqstan Respýblıkasynyń qylmystyq-protsessýaldyq kodeksiniń 201-babynyń talaptaryna sáıkes ózge aqparat jarııa etilmeıdi, — dedi Aqtóbe stantsııasyndaǵy JPB Imıdjdik jumys jáne ishki kommýnıkatsııalar qyzmetiniń jetekshisi Roza Tólegenqyzy.
Aıta keteıik, stýdent óte belsendi bolǵan. Aqtóbe stýdentteri alıansynyń atqarýshy dırektory qyzmetine de bıyl taǵaıyndalǵan.
Sonymen birge onyń sý tasqyny kezinde eriktilerdiń qatarynan tabylǵanyn áleýmettik jelidegi paraqshasynan kórýge bolady.
