Aqtóbelik sheber júnnen taqııa jasaý týraly qupııasymen bólisti
AQTÓBE. KAZINFORM – Aqtóbe qalasynda turatyn sheber ári ismer Gúlnur Asqarova júnnen taqııa, kartına jasap, jańa tehnologııany oqýshylarǵa úıretip júr. Sheber elimizde jún óńdeý tehnologııasy damymaǵan soń qolóner buıymdarynyń baǵasy qymbat ekenin jasyrmady.
Bıyl kıiz taqııalar sánge shyqty. Aqtóbelik sheber Gúlnur Asqarova osy ónerdiń tehnologııasyn qaıta qarap, jandandyrdy.
- Aldymen kıiz basýdy úırendim. Sapaly dúnıe jasaı alatynyma kóz jetkizgende ǵana bas kıim ázirledim. Qazir júndi basyp, dızaınyn jasap shyǵaramyn. Júndi daıyn kúıinde dúkennen alamyn. Kóbine reseılik ónim satylady. Sońǵy kezde Jambyldan satyp alamyn. Jún daıyn kúıinde keledi, biraq qymbat. 50 gr ózi 800 teńge turady. 1 keli jún baǵasy - 16 myń teńge. Bir taqııa jasaý úshin 40-45 gramm jún kerek. Al qıyny pishinin shyǵarý boldy. Sodan temir ustasyna baryp, formasyn ázirletip aldym. Alǵashqylarynyń keskini nashar bolǵanymen, keıin qolym jattyqty. Kıiz taqııa ázir bolǵan soń kestelep, sándeımin, - deıdi sheber.
Onyń aıtýynsha, kıiz taqııalary bir-birin qaıtalamaıdy. Ári bas kıimdi tikkende adamnyń kóńil-kúıi de mańyzdy ról atqarady.
- Sheber bas kıim tikpes buryn mýzeıge baryp, ulttyq kıim úlgilerimen tanysýy kerek. Zertteý júrgizse de artyq bolmas der edim. Sebebi bas kıimge salynatyn oıý-órnektiń mańyzy zor. Sonymen birge bas kıim jeńil ári yńǵaıly bolýy tıis. Ol ismerdiń sheberligi men kóńil kúıine de baılanysty. Adam qolyna qajetti zattardy alǵan sátten-aq bar zeıinin salyp, oıyn jınaqtasa, jaqsy dúnıe shyǵady. Ózim jaqsy kóńil-kúıde bolǵanda ǵana tigip, ázirleımin. Kıiz kartınalardy da dál solaı jasaımyn, - dedi Gúlnur Asqarova.
Sheber aldaǵy ýaqytta kıizden kıim basýdy maqsat etip otyr. Tek aldymen jún óńdeý isin bir júıege qoıý kerek.
- Bizge merınos júni kerek. Óte jumsaq jún ol. Biraq qazaqy qoı júninen de bas kıim, baıpaq jasaýǵa bolady. Olar tózimdi. Odan sómke, tipti kólikke qajetti chehol tige alamyz. Onyń bárine árıne shıkizat, jún kerek. Aýyl sharýalarynan júndi qaıda jiberetinin surasam, órteıtinin aıtty. Bul durys emes. Bir adam qolǵa alyp, damytýy kerek. Reseılikter kelip, qural-jabdyqtaryn tanystyrdy. Ázirge oǵan eshkim qyzyqpady. Meniń oıymsha osy isti shydamdy kásipker óz qolyna alyp, júndi jınap, óńdese óte tabysty bıznes bolar edi. Kıiz úı de suranysta, kıiz tósenishti de alady, - dedi sheber.
Gúlnur Asqarova 2020 jyldan beri Naýryz merekesine shyǵyp, qolóner buıymdaryn tanystyryp júr. Sońǵy jyldary suranys kúrt artqanyn aıtady. Al jergilikti sheberler lekti ıgere almaı, adamdar Qyrǵyzstan, Ózbekstannyń daıyn ulttyq kıimin satyp alyp jatyr.
- Biz osy baǵytta damyp, kásipti de damytýymyz kerek. Qazir ózim Shaǵarmashylyq akademııasynda qyzdardy qolóner buıymdaryn toqyp, tigýge úıretip júrmin. Keıin osy salany damytyp, kásip júrgizgim keledi, - dedi ol.
