Aqtóbelik sharýalar sý tasqyny kezindegi shyǵyndy áli óndire almaı júr: ákimdik túsindirdi
AQTÓBE. KAZINFORM — Aqtóbelik sharýalar tasqynnan keıin múlik shyǵyny áli ótelmegenin aıtyp, shaǵymyn jetkizdi. Qarjy Úkimet rezervinen bólinýi tıis.

Aqtóbelik sharýalar áli kúnge deıin múlik shyǵynyn óndire almaı júr. Byltyr arnaıy komıssııa baryp, teksergen, keıin shyǵyn kólemin anyqtaǵan. Alaıda arada jarty jyldan astam ýaqyt ótse de aqshasy túspedi.
— Oıyl aýdany boıynsha 53 sharýanyń mal shyǵynynan bólek, múlki búlindi. Sol múlikti qarap, baǵalady. Qujaty joq sharýalarǵa qor arqyly 5 mln teńgeden berildi. Al qujaty túgel bizder áli júrmiz. Qazir 31 sharýa qarjy qashan túsedi dep surap júrmiz. Shyǵynymyzdyń ózin byltyr kúzde eseptedi, — dedi sharýa qojalyǵynyń basshysy Andreı Hamıtuly.
Sharýalar qarjy qazir tússe, qurylys materıaldaryn arzan baǵada satyp alýdy jón kóredi. Al kóktem shyǵa qurylysqa kirispek. Olar malshy turatyn úı men qora salýdy josparlap otyr. Aqtóbe oblysy kásipkerlik basqarmasy bolsa, qarjy Úkimet rezervinen aýdarylatynyn habarlady.
— Aqtóbe oblystyq kásipkerlik basqarmasy 2024 jyldyń 20 jeltoqsanyna deıin sharýalardan ótinish qabyldady. Bıyl qańtarda Úkimettiń rezervinen óteý úshin qujattary jiberildi. Úkimet qaýlysy shamamen aqpan aıynyń sońyna, naýryzdyń basyna qaraı shyǵady. Sol kezde ótemaqy beriledi. Alǵashynda bul shaǵyn jáne orta bızneske arnalǵan shyǵyndy óteý erejesi boldy. Keıin oǵan aýyl sharýashylyǵy qurylymdary kiristirildi. Áý basta aqsha 2025 jyly beriletinin de sharýalar biledi, — dedi Aqtóbe oblystyq kásipkerlik basqarmasynyń basshysy Almas Salyqbaev.
Eske salsaq, aqtóbelik sharýalar byltyrdan beri sý tasqyny kezinde buzylǵan qorasy men úı shyǵynyn ótep berýdi surap otyr.