Aqtóbelik sharýalar qora men sharýashylyqtaǵy úı shyǵynyn óteýdi suraıdy
AQTÓBE. KAZINFORM – Aqtóbelik sharýalar sý tasqyny kezinde buzylǵan qorasy men úı shyǵynyn ótep berýdi surap otyr. Ázirge olarǵa baǵalaý jumystary júrgizilmedi.
Aqtóbe oblysy Yrǵyz aýdanyndaǵy «N-Sydyq» sharýa qojalyǵynyń basshysy Shyńǵys Ospanov arada 4 aı ótkende ǵana qorasy men qojalyqtaǵy úıin baryp kórdi. Osy ýaqytqa deıin evakýatsııalyq beketti, keıin týma-týystary men jaldamaly páterdi panalap júrgen ol jaramsyz bolyp qalǵan múlik shyǵyny qashan óteletinin bilmeıdi.
«Sharýashylyqqa 4 aıdan keıin kelip turmyn. Munda buryn eshteńe bolmaǵandaı kúıde tur. Aınalanyń bárine shóp ósip ketken, jol joq. Qystan qalǵan 500 býma shóp bar edi. Qazir tek 100 býmasy qalǵan. Shóp shabatyn tehnıkamyz sýda qaldy. Trasformator janyp, istemeı qaldy. Kún batareıasy da jaramsyz kúıde tur. Bizge kómek kerek. Shyǵynymyz 17-18 mln teńge bolyp tur. Bizge shyǵyndy esepteýge adam kelmedi», - dedi «N-Sydyq» sharýa qojalyǵynyń basshysy Shyńǵys Ospanov.
Onyń aıtýynsha, sý 2 metrge kóterilgen. Qazirgi kezde de ár jerde sý jınalyp tur.
«Biz úıdegi turmystyq tehnıkamyzdy alyp shyǵa almadyq. Bul sharýashylyq bolǵanymen, biz osynda turdyq. Endi qazir qaıda baryp, kimnen kómek suraıtynymyzdy bilmeımiz»,- dedi Shyńǵys Ospanov.
Oıyl aýdanynyń turǵyny Andreı Hamıtulynyń habarlaýynsha, bir aıǵa jýyq ýaqyt buryn qujattardy jınap, úı men qora shyǵyny óteletini aıtylǵan.
«Úıge 5 mln, qoraǵa 3 mln teńgeden beremiz dep aıtty. Biraq ázirge aqsha aýdarylmady. Áli kúnge deıin adamdar vagonda, aǵash úıde otyr. Kimge baryp, kimnen kómek surarymyzdy bilmeımiz», - dedi Andreı Hamıtuly.
Aqtóbe oblystyq Aýyl sharýashylyǵy basqarmasynyń basshysy Qusaıyn Sársembaıdyń aıtýynsha, oblys sharýalarynyń jalpy shyǵyny 725 mln teńge bolyp tur. Ázirge eshqaısysyna aqsha aýdarylmady.
«Qazirgi kezde báriniń shyǵyny esepteldi. Keı sharýalarǵa baǵalaý komıssııasy barmady degen máselege keler bolsaq, ony aýdannyń ákimdigi sheshedi. Bizge qandaı baǵasyn beredi, tólmeımiz. Biraq búginde qorda aqsha joq. Ol tek qordan tólenetin shyǵyn. Sebebi ol shyǵyndy óteý týraly eshqandaı ereje joq. Biz «Paryz» qoryna aqsha túskenin kútip otyrmyz. Oblys ákimi jaqyn mańda aqsha túsetinin aıtty. Shyǵyn barlyq aýdanda bar. Basym bóligi Oıyl men Yrǵyzda», - dedi Qusaıyn Sársembaı.
Onyń aıtýynsha, qujaty rettelmegen mal shyǵyny osy qor arqyly ótelgen. Qazir bul jumys aıaqtalǵan.
Aıta keteıik, Aqtóbe oblysynda kóktemgi sý tasqyny kezinde 1 myńnan astam úı jaramsyz bolyp qaldy. Qazir aýdandardyń bárinda daıyn úı satyp alý jumysy aıaqtaldy.
