Aqtóbelik polıtseı zattaı aıǵaq retinde tárkilengen temekini kásipkerge ótkizip jibergen

AQTÓBE. KAZINFORM — Aqtóbe oblysy Mártók aýdandyq polıtsııa bólimi bastyǵynyń orynbasary qylmystyq is boıynsha zattaı aıǵaq retinde tárkilengen temekini jaýapkershiligi shekteýli seriktestikke berip jibergen. Memleketke 243 mln teńge shyǵyn keltirdi. Sot úkimimen polıtsııa qyzmetkeri bas bostandyǵynan aıyryldy.

Qylmystyq is Mártók aýdandyq sotynda qaraldy. Mártók aýdandyq polıtsııa bólimi bastyǵynyń orynbasaryna Qylmystyq kodekestiń «Bılikti nemese laýazymdyq ókilettikterdi asyra paıdalaný» baby boıynsha aıyp taǵyldy.

Іs materıalyna súıensek, Mártók aýdandyq polıtsııa bólimi bastyǵynyń orynbasary 2020 jyly tamyz aıynda zattaı aıǵaq retinde tárkilengen 611 960 dana temekini qorabymen jaýapkershiligi shekteýli seriktestikke zańsyz berip jibergen.

JShS-nen oblystyq PD esepshotyna eshqandaı qarjy aýdarylmady. Nátıjesinde shyǵyn kólemi 243 mln teńgege jetken. 

— Sottalýshy kinásin moıyndamady. Alaıda temekini satý úshin bergenin, bul rette eshqandaı paıdakúnemdik nıeti bolmaǵanyn kórsetti. Prokýror sottan QR QK-niń 362-baby 4-bóligi 3-tarmaǵy boıynsha kináli dep tanýdy jáne polıtsııa maıory sheninen, 7 jylǵa bas bostandyǵynan aıyrý túrindegi jazany taǵaıyndaýdy surady. Sottyń úkimimen E. 5 jyl 6 aı merzimge bas bostandyǵynan aıyryldy. Ol ómir boıy memlekettik qyzmette jumys isteı almaıdy. Úkim zańdy kúshine engen joq, — dep habarlady Mártók aýdandyq sotynyń baspasóz qyzmeti.