Aqtóbelik oqýshylar qaratorǵaı kúnine oraı 70 uıa jasap shyqty
AQTÓBE. KAZINFORM — Aqtóbe qalasyndaǵy № 56 orta mekteptiń ustazdary, oqýshylary men ata-analary Qaratorǵaı kúnin atap ótti, dep habarlaıdy ákimdiktiń baspasóz qyzmeti.
Bul shara «Taza Qazaqstan» jalpyulttyq baǵdarlamasy aıasynda uıymdastyryldy.
Bul erekshe kúnniń qurmetine qalanyń 12-shaǵyn aýdanyndaǵy Jaǵalaý saıabaǵynda qaratorǵaılarǵa arnap uıalar ornatyldy. Uıalar ata-analar men oqýshylardyń kúshimen túrli materıaldardan jasaldy. Olardy aǵashtarǵa ata-analardyń ózderi ornatty. Bul bastamanyń ıesi — qaladaǵy belgili landshaft dızaıneri Alesıa Moskaleva. Al bastamany iske asyrýǵa oqý ordasynyń janynan qurylǵan «Analar mektebi» qulshyna kirisken.
— Mektebimizde osydan úsh jyl buryn «Analar mektebi» qurylǵan bolatyn. Ata-analardyń mundaǵy maqsaty — tárbıe isin ustazdarmen birlese júrgizýge barynsha den qoıý. Osy oraıda únemi túrli bastamalarǵa, paıdaly isterge uıytqy bolyp júretin ata-ana kóp. Búgingi bastamany biz, mektep ujymy, óz tarapymyzdan qoldadyq. Barlyǵy 70 uıa jasaldy. Bir bóligi — mektep aýlasyna, odan soń Táýelsizdik dańǵyly boıyndaǵy aǵashtarǵa ornatyldy. Búgin taǵy bir tobyn osy saıabaqqa ákeldik, — dedi mektep dırektory Gúlnara Narymbetova.
3 «Z» synybynda oqıtyn Álramı Toqtamysovtyń aktsııaǵa arnap ákelgen uıasy ádemi shyqqan. Balanyń ájesi Aqmonshaq Embergenovanyń aıtýynsha, ony jasaýǵa búkil otbasy atsalysqan.
— Alty nemerem bar. Ózim áskerı saladan zeınetke shyqtym. Múmkindiginshe ómirlik tájirıbemdi, kúsh-qýatymdy eń aldymen nemerelerimniń tárbıesine arnaǵym keledi. Qazir balalar smartfonǵa qumar. Sondyqtan osyndaı sharalardy jıi uıymdastyryp, balalardy tabıǵatpen dostyqqa beıimdeýimiz kerek. Mundaı bastamalardy alda da qoldaýǵa daıynbyz, — deıdi Aqmonshaq Embergenova.
Osyǵan deıin Úkimet apparaty «Taza Qazaqstan» ekologııalyq bastamasy aıasynda senbilikke qatysqanyn jazdyq.