Aqtóbelik oqýshylar Dımash Qudaıbergenniń jankúıerin sán-saltanatpen qarsy aldy

Aqtóbe qalasyndaǵy M.Qurmanǵalıeva atyndaǵy №32 mektep-gımnazııasy búgin Ester Ýlmanıdi kútip aldy. Mekteptegi jazǵy lagerde tárbıelenip jatqan balalar «Taý ishinde» ánine bılep, tańǵy jattyǵýyn jasady. Keıin shveıtsarııalyq meıman mektep murajaıyna kirip, bilim ordasynyń tynysymen tanysty. Munda Qazaqstannyń halyq ártisi Dımash Qudaıbergenge arnalǵan arnaıy burysh bar. Onda fotosýretteri, ánshiniń oqýshy kezindegi synyp jýrnaly men jankúıerler syıǵa tartqan kádesyılar saqtaýly.

- Ester Ýlmanı «Dımash Qudaıbergen jáne Qazaqstan: meniń ómirimdi qalaı ózgertti?» kitabyn syıǵa berdi. Kitaptyń tusaýkeseri Astana qalasynda boldy. Ester hanym bul kitapta Qazaqstan, Dımash týraly estelikterin jıǵan. Elimizge, Dımashqa degen qurmeti úshin alǵys aıtamyz. Bul mektep elimiz boıynsha eń alǵash ashylǵan gımnazııa. Esigimiz árdaıyn ashyq,- dedi ánshiniń alǵashqy ustazy Klara Qajǵalıeva.

Shveıtsarııadan kelgen Ester Ýlmanı qazaqsha sóıleıdi. Ol qazaq jerine, kútip alǵan ustazdary men oqýshylarǵa alǵysyn aıtty.

- Dımashnyń ánin men alǵashqy kezde YouTube-tan estidim. Bul 2020 jyl edi. Al 2022 jyly Almaty qalasyndaǵy kontsertin tamashalaýǵa keldim. Men ánshiniń týǵan jerine, Aqtóbege kelýdi armandaǵan edim. Sol armanym búgin oryndaldy. Bir ǵana tilegim bar. Álemde beıbitshilik bolsyn! Álemdegi azap pen qaıǵy toqtasyn! Qudyretti kúshti Jaratqan ıe, barshamyzǵa jol kórsetip, qorǵap júrsin,- dedi Ester Ýlmanı.

Ánshiniń jankúıerimen kezdesýge «Mahabbat ber maǵan» ániniń avtory Oral-Qosaı Baıseńgir men №32 mektep-gızımnazııasynyń ustazdary jınaldy. Munda barlyǵy 100-den astam pedagog bar. Al bala sany 1400-den asady. Mektep ujymy 2017 jyldan beri ánshi Dımash Qudaıbergenniń jankúıerlerine qurmet kórsetip keledi. Aqtóbege álemniń ár túkpirinen keletin jankúıerler mindetti túrde ol oqyǵan mektepke baryp, partasyna otyrady. Bıyl Túrkııa elinen de tyńdaýshylary keldi.

Aıta keteıik, Dımashtyń Nıý-Iorktegi tarıhı kontserti jaıly derekti fılmi kórermenge jol tartady.

Dımash Qudaıbergenniń latynamerıkalyq jankúıerleri taıaýda alty eldiń ónerpaz jankúıerlerin biriktirgen «Omir» atty halyqaralyq shyǵarmashylyq jobany usyndy.