Aqtóbelik oqýshylar 4 myń asyqtan kıiz úıdiń maketin jasap shyqty
AQTÓBE. KAZINFORM – Kıiz úı maketiniń salmaǵy 15 keli bolyp tur. Asyqty birneshe oblystyń oqýshylary jınap berdi.
Nazarbaev zııatkerlik mektebiniń oqýshylary «Týǵan elge taǵzym» zertteý espedıtsııasyna qatysty. Aqtóbemen qatar Astana, Óskemen, Taraz qalalarynan oqýshylar kelip, joba daıyndady. Bıylǵy joba aqyn Abaı Qunanbaıulynyń 180 jyldyǵyna arnaldy.
- Oqýshylarǵa aldyn ala habar berip, asyq ala kelýdi suradyq. Sebebi 4 myń asyqty tabý qıyn. Oǵan deıin aqtóbelik balalar karton qaǵazdan kıiz úı maketin jasap qoıdy. Al ózge óńirdiń oqýshylary kelgen soń ózderi jelimmen jabystyrdy. Salmaǵy – 15 keli. Dıametri – 1 metr, bıiktigi – 80 sm. Sonymen birge negizgi maqsat – tabıǵatty qorǵaý. Tek ekologııalyq taza materıal qoldanyldy. Bul da belgili bir qundylyqty úıretýge múmkindik berdi,- dedi Nazarbaev zııatkerlik mektebiniń Aqtóbedegi dırektory Qaıyrbek Sábıtuly.
Onyń aıtýynsha, balalar qazir asyq oınaǵandy unatady. Úziliste, bos ýaqyttarynda ulttyq sportpen de shuǵyldanady.
Eske salsaq, topaı asyq jınaǵan aqtóbelik Qazaqstan rekordtar kitabyna endi. Ol 3 myńnan astam topaı asyq jınady. Gınness rekordtaryn jańartyp, jınaǵan asyǵynan úlken músin jasaýdy armandaıdy.