Aqtóbelik oqýshy synyptasynyń telefony arqyly terrorızm týraly jalǵan aqparat taratty
AQTÓBE. KAZINFORM – Aqtóbe polıtsııasy mektepterdiń birinde terrorlyq akt bolatyny týraly jalǵan habarlama bergen oqýshyny anyqtady.
Oqıǵa keshe saǵat 10:00-de bolǵan. Oblystyq PD baspasóz qyzmetiniń habarlaýynsha 112 telefon nómirine belgisiz bireý qońyraý shalyp, mektepterdiń birinde terrorlyq akt bolatyny, oqýshylarǵa qaýip tónip turǵany jaıly aıtqan. Jedel qyzmetter bilim ordasyna dereý jetip, habarlamanyń jalǵan ekenin anyqtady.
«Polıtsııa qyzmetkerleri mán-jaıdy zertteý kezinde qońyraý shalýshyny anyqtady. Ol mekteptiń joǵary synyp oqýshysy bolyp shyqty. 16 jastaǵy jasóspirim synyptasynyń telefonyn paıdalanǵan. Terrorızm aktisi týraly kórineý jalǵan habarlaý faktisi boıynsha polıtsııa qylmystyq is qozǵap, sotqa deıingi tergep-tekserý júrgizip jatyr. Bul bap boıynsha qylmystyq jaýapkershilik 14 jastan bastalady. Sonymen qatar kámeletke tolmaǵan balanyń ata-anasy da jaýapqa tartylady. Ári jalǵan habarlama kezindegi jedel qyzmettiń shyǵynyn óteıdi», - dep habarlady oblystyq PD baspasóz qyzmetiniń jetekshisi Erbolat Sarqulov.
