Aqtóbelik oqýshy qaýip tóngenin habarlaıtyn qosymsha oılap tapty
AQTÓBE. KAZINFORM – Aqtóbe qalasynda mektep oqýshysy jasandy ıntellektini paıdalanyp, jańa qosymsha oılap tapty. Qosymsha oqýshyǵa qaýip tóngenin birden bilip, polıtsııaǵa shuǵyl habar bere alady.
Aqtóbe qalasy U.Qulymbetov atyndaǵy №64 orta mektebiniń 10-synyp oqýshysy Tumar Smaǵul jasandy ıntellektiniń qyr-syryn meńgerip júr. Ol túrli zertteý júrgizip, «NazarAI» qosymshasyn oılap tapty. Qosymsha beınekamera materıaldaryn jasandy ıntellekt arqyly óńdeıdi, ıaǵnı, adamdy taný, adam áreketin modeldeý, qaýipti sátte shuǵyl habarlaý sekildi jumystardy uıymdastyrady.
- Bul qosymshanyń birneshe qyzmeti bar. Sonyń biri - mektepke kelgen oqýshylardyń beıne kameradaǵy keskinin taný jáne olardyń mektepke kelgen sátin avtomatty túrde ata-analarǵa habarlaý. Habarlamada oqýshynyń sýreti, aty-jóni, kelgen ýaqyty kórsetiledi. Sonymen qatar qosymshanyń taǵy bir qyzmeti - qaýipti sátti anyqtaý. Oqýshy qaýip-qater tóngen sátte eki qolyn kóterse, jasandy ıntellekt beınedegi adam áreketiniń kompıýterlik modelin qurastyrady. Osylaısha adam qoly, býyndarynyń burysh gradýstary arqyly esepteýler júrgizip, qaýip-qaterdi anyqtaıdy. Keıin adam beınesine skrın jasap, nátıjesin saqtaıdy jáne osy adamǵa qaýip tóngeni týraly aqparatty «Dabyl» telegramm kanalyna jiberedi. «Dabyl» telegramm kanalyna ishki ister organdarynyń arnaıy bólimi tirkelgen. Bul kanaldyń maqsaty - mekteptegi qaýip-qaterdi quzyrly organdarǵa jyldam jetkizý, - dep habarlady Aqtóbe oblystyq bilim basqarmasynyń baspasóz qyzmeti.
Aıta keteıik, joba jetekshisi Erbol Qýanyshuly men jas zertteýshi Tumar Smaǵul jańa qosymshany áli de zerdelep, jańa múmkindikterin qarastyrýdy josparlap otyr.
