Aqtóbelik oqýshy qaryndasymen birge quraq qurap, kórpe tigedi
AQTÓBE. KAZINFORM – Aqtóbe qalasyndaǵy orta mektepte bilim alatyn aǵaıyndy Ámirbaevtar ata-anasyna qolqabys etip, quraq qurap júr. Olar túrli baıqaýda da jeńiske jetken.
Aqtóbe qalasyndaǵy №48 orta mektepte oqıtyn Ýálıhan Ámirbaev osydan 5 jyl buryn ájesimen birge sheberlik saǵatyna qatysty. Sol kezde alǵash ret kórpe tigý óneriniń has sheberlerin kórip, tanysty. Ózi de kishkentaıynan ájesine kómektesip, quraq quraýdy meńgerip alǵan.
– Men 9 jastap bastap tigýdi úırendim. Sol kezde sheber Yrza Tursynzadamen tanystym, keıin áleýmettik jelide vıdeolardy kórip, ishki sezimim oıandy. Sóıtip qyzyǵýshylyǵym arta tústi. Qandaı da bir qıyndyqqa keziktim dep aıta almaımyn. Ájem de, anam da tiginshi. Ájem tigip, qurap júrgende qyzyǵyp, «men de tigip kóreıinshi» dep aıttym. Qolymdy qaqpaı, qaıta bar bilgenin úıretti. Sodan qyzyǵýshylyǵym artyp, is tigýdi bastap kettim. Aldymen kórpedegi oıýdy bastyryp tiktip, keıin qudyq quraqty úırendim. Eń qıyny – sheshen quraq, - deıdi 9-synyp oqýshysy Ýálıhan Ámirbaev.
Ol qazir ózin tanıtyn adamdardyń jyly lebizine bólenip tur. Ustazdary da, týma-tystary da bozbalanyń talantyn baǵalaıdy, maqtan tutady. Al ózi bul isti jarty jolda tastamaı, qaıta bar ynta-jigerimen kirisken.
– Maǵan is tikken unaıdy. Tipti bes saǵat boıy otyra beremin. Eger jumys kóp bolsa, qyzyqty vıdeo materıal qosyp qoıyp, kórmesem de tyńdap otyramyn. Bolashaqta da osy ispen shuǵyldanyp, oıda júrgen kóp dúnıeni tige alamyn dep esepteımin. Ózim bıznespen aınalysqym keledi, - dedi ol.
Ýálıhannyń qaryndasy Jamal da kishkentaıynan is tigýge qyzyqty. Ol 8 jasynda tigin mashınasyna otyrdy, lezde meńgerip aldy.
– Adam óz aldyna maqsat qoısa, soǵan saı jumys isteıdi dep oılaımyn. Men de is tikkim keldi. Negizi quraq qurap, kórpe tigý úshin osy iske qyzyqqan durys. Yntalansa, belgili bir erejege baǵynsa, jetistikke jetýge bolady. Adamǵa jan-jaǵy da áser etedi, - dedi ol.
Іsmer oqýshy ózine senim artqan ájeseniń de, anasynyń da úmitin atqap júr. Qajet kezde 3-4 saǵat tigin mashınasynyń janynda otyrady.
– Búgingi júktemeni erteńge de qaldyrmaımyn. Bul – meniń negizgi ustanymdarynyń biri, - deıdi №36 orta mekteptiń 8 synyp oqýshysy Jamal Ámirbaeva.
Aqtóbede 300 adamǵa arnalǵan sheberlik saǵaty bul otbasynyń jańa bir isti úırenip, kásip bastaýyna túrtki boldy. Úsh kúnge sozylǵan festıval kezinde quraq qurap, keıin satýǵa múmkindik jasaldy. Al úzdikterine tigin mashınasy berildi. Sodan keıin elde karantın bastalyp, kóp adam úıde otyrdy.
– Onlaın konkýrsqa da qatysyp, «Ata kásibi – bala kásibi» festıvalinde sertıfıkat ıelendik. Ýálıhan qaryndasymen birge baq synady. Sodan keıin qyzyǵyp, janymyzda júr. Negizi meniń anam da quraq quraıdy. Men de is tigemin. Eki balam da izimizdi jalǵap keledi. Qazir matany qıyp, quraqqa ázirleımin. Al balalar quraqty qurap, anam kórpeniń bólshekterin qurastyrady. Sóıtip qyz jasaýyna tapsyrys alamyz. Tek aldyn ala aıtyp, unatqan túrin tańdasa bolǵany, - deıdi tiginshi balalardyń anasy Meıramgúl Alhabaeva.
Ol aldaǵy ýaqytta daıyn bıznesti kásipke aınaldyrǵysy keledi. Bul týraly balalaryna da aıtyp júr.
– Qyz jasaýyn bir adam tige almaıdy. Oǵan kómekshi kerek. Ulymnyń da, qyzymnyń da qolqabys etip júrgeni sodan. Ári ekeýi de is tigýge qushtar. Bizdiń bıznes bastaýǵa arnalǵan sertıfıkatymyz da bar. Bálkim keleshekte úlken is te bastarmyz. Qazir suranys bar. Sapaly dúnıeni satyp alǵysy keletinder qashanda tabylady, - deıdi Meıramgúl Alhabaeva.
Onyń aıtýynsha, qyz jasaýyn daıyndaý úshin bir aı ýaqyt qajet. Eger tapsyrys berýshi qalasa 2-3 apta ishinde ádimi dúnıeni daıyndap beredi.
Aıta keteıik, byltyr qazaqstandyq sheberler quraq kórpe tigýden álemdik rekord ornatty. Elimizdiń ár óńirinen jınalǵan sheber ájeler quraǵan kórpe álemdik rekord retinde tirkeldi.
Sondaı-aq Aqtóbe qalasynyń 155 jyldyǵy aıasynda qolóner sheberleri 155 metrlik kórpe tikti. Bári de sý tasqynynan zardap shekken aqtóbelikterge taratyldy.