Aqtóbelik muǵalim tórt túlik súıeginen kádesyı jasap júr
AQTÓBE. KAZINFORM – Jylqynyń qaraqusy bir qaraǵanda sıyrǵa, ekinshi jaǵyn aınaldyrǵanda qoshqarǵa uqsaıdy. Al sıyrdyń aýyz omyrtqasynan mysyq pen qyran qusty kóremiz. Sheber Birlik Soltan qazir bar bilgenin mektep oqýshylaryna úıretip júr.
Aqtóbe oblysy Qobda aýdany Taldysaı orta mektebiniń muǵalimi Birlik Soltan atadan qalǵan sheberlik syryn balalarǵa úıretip júr. Ózi muǵalim ári bilim ordasynda arnaıy úıirme ashyp qoıdy. Munda balalar maldyń súıegin ajyratyp, ony óńdep úırenedi. Ol úshin kóp dúnıeniń qajeti joq. Súıek pen aǵash óńdeýge arnalǵan qural-saıman bolsa jetkilikti. Balalar egeý, ara ustap ta úırenedi.
– Maldyń súıegin izdep júrmeımiz. Et asqanda súıek mújip, jınaımyn. Keıin soda men ydys jýýǵa arnalǵan suıyqtyq qosyp qaınatyp, maıynan ajyratyp alamyn. Bir kúnde kebedi, ıaǵnı, óńdeýge daıyn. Oqýshylarmen birge odan túrli kádesyı jasaımyz. Súıekten túrli dúnıe jasap júrgenime 25 jyldaı boldy. Al mekteptegi qolóner sheberi úıirmesine 5-9 synyp oqýshylary qatysady. Aptasyna tórt saǵat beriledi, - dedi qolóner sheberi Birlik Soltan.
Mektep oqýshylary súıekten túrli kádesyı jasaýǵa qyzyǵady. Alaıda ótkir ıiske keıbiri shydamaıdy. Al óńdelgen soń bárin laktap, kóz qyzyǵatyn dúnıeni bir-birine tartý etedi.
– Súıekten jasalǵan kádesyılar Qobda aýdanynyń mýzeıinde, sonymen birge Almatyda óner mýzeıinde bar. Alǵashqy kádesyılardy qolqa salyp surap alyp, sonda qoıdy. Munyń bárin ákemnen úırendim. Olar da sheber bolǵan. Ata-babamyz maldy qaldyqsyz kádege jaratqan. Terisinen túrli buıym jasady, súıegin de qoldandy. Kóbine ózim ǵana soıǵan maldyń súıekterin ǵana jaratamyn. Qolǵa uqsaǵanda jańa bir dúnıege uqsatsam, jasap shyǵaramyn. Máselen jylqynyń qaraqusy bir qaraǵanda sıyrǵa, ekinshi jaǵynan qaraǵanda qoshqarǵa uqsaıdy. Sıyrdyń aýyz omyrtqasyn ekige bólgende birinen mysyqtyń beınesi, ekinshisinen qyran qustyń beınesin kóremiz. Sonda bir súıekten eki kádesyı shyǵyp tur, - dedi ol.
Sonymen birge qoıdyń jaýyrynyna túrli sýret salyp, ony oıyp, ústel ústine qoıatyn kádesyı ázirleıdi. Eshki múıizinen pyshaqtyń qynyn jasaýǵa bolady. Sıyrdyń múıizinen balyqtyń beınesin kórýge bolady.
Mektepterde eńbek páni muǵalimderiniń kóbi elimizde qolónerdi damytyp otyr. Máselen Yrǵyz aýdany Mamyr aýylyndaǵy negizgi mekteptiń muǵalimi Qanatbek Júnisov shalǵaı jerde otyryp-aq aǵashtan, áınekten, temirden túrli buıym jasaıdy. Ol aýyl balalaryna sheberliktiń qyr-syryn úıretip júr.