Aqtóbelik qutqarýshylarǵa jańa tehnıka men qyzmettik páter berildi
AQTÓBE. KAZINFORM – Aqtóbe oblysyna jumys sapary aıasynda Tótenshe jaǵdaılar mınıstri, general-maıor Shyńǵys Árinov pen oblys ákimi Ashat Shaharov óńirdiń qutqarý bólimshelerine arnaıy tehnıkany saltanatty túrde tabys etti. Sondaı-aq aýdandyq qyzmetterdiń úzdik qyzmetkerlerine 10 qyzmettik páterdiń kiltin tapsyrdy.
Berilgen tehnıka ishinde zamanaýı órt sóndirý avtotsısternalary, jol talǵamaıtyn kólikter jáne mamandandyrylǵan ınjenerlik avtomobılder bar. Jańa jabdyq tótenshe jaǵdaılarǵa den qoıýdyń jedeldigin edáýir arttyrýǵa jáne jergilikti jerlerde bólimshelerdiń tehnıkalyq bazasyn nyǵaıtýǵa arnalǵan.
– Qutqarýshylardy qoldaý tek tehnıka men ınfraqurylym ǵana emes. Bul kúndelikti qaýipsizdikti qamtamasyz etetin adamdardyń eńbegin moıyndaý. Biz aldaǵy ýaqytta da aýmaqtyq bólimshelerdi — tehnıkalyq jaǵynan da, áleýmettik jaǵynan da júıeli túrde kúsheıtetin bolamyz, - dep mınıstr atap ótti.
Qyzmettik turǵyn úıler kóp jylǵy qyzmeti men mamandyqqa adaldyǵy úshin berilgen rızashylyqtyń sımvoly. Páterlerdi óz qyzmetinde joǵary jaýapkershilik pen kásibılik tanytqan qyzmetkerler aldy.
Oblys ákimi Ashat Shaharov ta óńirlik deńgeıde qutqarý bólimsheleriniń daıyndyǵy men jaraqtandyrylýyn qamtamasyz etýde jan-jaqty qoldaý kórsetý boıynsha jumys jalǵasatynyn atap ótti.
– Óńirge jergilikti bıýdjet esebinen lızıngke alynǵan zamanaýı tehnıka jetkizildi. Bul jaı ǵana flotty jańartý emes, ár turǵynnyń qaýipsizdigine naqty ınvestıtsııa. Qyzmettik páterlerdi berý-bizdiń qutqarýshylarymyzǵa kúndelikti eńbekteri úshin qurmet pen rızashylyqtyń belgisi. Mundaı bastamalar aldaǵy ýaqytta da jalǵasatyn bolady, - dep óńir basshysy aıtty.
Sapar aıasynda mınıstr Aqtóbe qalasyndaǵy «Qazaq halqyna myń alǵys» stellasyna baryp, TJD jeke quramymen kezdesti. Ortalyq alańda arnaıy tehnıka men jabdyqtar kórmesi uıymdastyrylyp, qutqarý qyzmetteriniń qazirgi zamanǵy jabdyqtalý deńgeıi men daıyndyǵy kórsetildi.
Qazaqstan TJM materıaldyq-tehnıkalyq bazany jańǵyrtý, qyzmetkerlerdi áleýmettik qoldaý jáne óńirler deńgeıinde den qoıý tıimdiligin arttyrý jónindegi keshendi sharalardy iske asyrýdy jalǵastyrady.