Aqtóbelik qutqarýshylar órtti sóndirý kezinde kórsetken erligi úshin nagradtaldy
ASTANA. KAZINFORM — Aqtóbe oblysynyń ákimdiginde órtti sóndirýge qatysýshylardy qurmetteýge arnalǵan saltanatty jıyn ótti, dep habarlaıdy TJM baspasóz qyzmeti.
Kórsetken erligi men janqııarlyǵy úshin oblys ákimi Ashat Shaharov TJM qyzmetkerlerine alǵys bildirdi.
Órtti sóndirýge qatysqan 172 TJM qyzmetkeri alǵys hattarmen jáne syıaqylarmen nagradtaldy. Oblys ákimi qutqarýshylardyń áreketteri qyzmetke adaldyqtyń, halyq aldyndaǵy jaýapkershiliktiń úlgisi ekenin atap ótip, jas urpaqqa shabyt beretinin aıtty.
Esterińizge sala keteıik, 7 sáýir kúni Aqtóbe qalasynda Ábilqaıyr han dańǵylynda ornalasqan oblystyq ákimdiktiń 6 qabatty ákimshilik ǵımaratynyń shatyrynda órt shyqqan. TJD kúshteri men quraldary oqıǵa ornyna 5 mınýt ishinde jedel jetti. Alǵashqy órt sóndirý bólimsheleri kelgen kezde ártúrli jerlerde úsh ashyq janý oshaǵy baıqaldy. Dereý órt sóndirý oqpandary berilip, órtti tolyq sóndirý úshin barlyq sharalar qabyldandy, sýdyń úzdiksiz berilýi qamtamasyz etildi. Oqıǵa ornynda jedel shtab jumys istedi. Órtti sóndirý úlken aýmaqta ottyń qarqyndy taralýymen, janǵysh materıaldardyń bolýymen, qoıý tútinmen, joǵary temperatýramen, sondaı-aq ǵımarattyń konstrýktıvtik erekshelikterimen qıyndady. Órtti sóndirýge jeke quramnan 140-tan astam qyzmetker jáne 40 birlik tehnıka jumyldyryldy. TJM kúshteri órtti 300 sharshy metr aýmaqta tolyqtaı sóndirdi.
Sonymen qatar órtti oqshaýlaý kezindegi sheshýshi sátte qutqarýshylar shatyrǵa kóterilip, Qazaqstan Respýblıkasynyń memlekettik týyn túsirip, ony zaqymdamaı saqtap qaldy.
