Aqtóbelik kelinshek «Almaty-Aqtóbe» baǵytyndaǵy poıyzda bosanyp qaldy

«Almaty-Aqtóbe» baǵytyndaǵy poıyzǵa mingen júkti kelinshekti jolserik bosandyryp aldy. Keıin ony jaqyn mańdaǵy Jem stansasynda dárigerlerge tapsyrdy, dep habarlaıdy Kazinform. 

Oqıǵa ótken aptanyń sońynda boldy. Júkti kelinshek «Almaty-Aqtóbe» baǵytyndaǵy poıyzǵa Toǵyz stansasynan mingen. Sol kezde tolǵaq qysyp, jolserikke habar berildi. Al jolserik poıyz mashınısine aıtyp, jaqyn mańdaǵy stansaǵa jedel járdem shaqyrtty. Jem stansasyna jetkenshe áıeldi jolserik bosandyryp aldy. «Jolaýshylar tasymaly» AQ baspasóz qyzmetiniń habarlaýynsha, poıyzdyń jolserigi Ǵalııa Qabdrahmanova vagonda bosanǵan áıelge qajetti kómek kórsetti. Keıin náreste men anasyn jedel járdem qyzmetkerleri qabyldady.

«Men balamnyń ómiri úshin qatty qoryqtym. Alaıda poıyz qyzmetkerleri maǵan osyndaı jaǵdaıda kómek kórsetip, janymnan ketpeı, aman-esen bosanýyma septigin tıgizdi. Bul kún bizdiń otbasymyz úshin esten ketpes sátterdiń birine aınaldy. Endi qyzym eseıgen kezde bul erekshe oqıǵany aıtatyn bolamyz», - dep bólisti jas ana Aınagúl Tileýbergenova. Ata-anasy dúnıe esigin ashqan náresteniń esimin Malıka dep qoıǵan.

Aıta keteıik, jolserikterdiń kómegimen sońǵy 3 jylda «Jolaýshylar tasymaly» AQ poıyzdarynda 11-ge jýyq sábı dúnıege keldi.