Aqtóbelik kásipker tasqynnan zardap shekken turǵyndarǵa mal jáne tuqym berdi

AQTÓBE. KAZINFORM – Aqtóbelik kásipker Amanǵos Tóleýov sý tasqynynan eń kóp zardap shekken Qobda jáne Oıyl aýdandaryna 100 tonna bıdaı, 100 tonna arpa tuqymy men mal berdi.

Aqtóbe oblysynda sý tasqynynan zardap shekkenderge kómek kórsetý úshin qoǵamdyq qor jumys istep tur. Sonymen berge jergilikti kásipkerler de kómektesip jatyr.

- Ujym kómektesýge sheshim qabyldady. El úshin eńbek etip, aýyldy da kórkeıtip júrgen azamattarǵa dep 100 tonna bıdaı, 100 tonna arpa, 50 tonna sýdan shóbiniń tuqymyn bólý jón dep sanadyq. Sonymen birge 200 qoı, 50 iri qara berip otyrmyz. Aqtóbe oblystyq aýyl sharýashylyǵy basqarmasymen aqyldasa kele Oıyl aýdanyna 40 tonna arpa, 25 tonna sýdan shóbiniń tuqymyn, 200 qoı men 50 qashardy bóletin boldyq. Qalǵany Qobda aýdanyna beriledi. Halyqty eshkim dalada qaldyryp jatqan joq. Birinshi kúnnen bastap Prezıdentimiz, Úkimet basshysy da aıtyp, el bolyp kómegin berip jatyr. “Eshkimdi syrt qaldyrmaımyz, báriniń shyǵynyn óteımiz” dedi. Bul úlken demeý, - dedi aqtóbelik kásipker Amanǵos Tóleýov. 

Onyń aıtýynsha, bala kezinde Qarǵaly aýdanyna tyń ıgerýshiler kelgen. Bul 1957 jyl bolatyn. Sol kezde Amanǵos Tóleýovtyń ákesi kópbalaly ýkraın otbasyna bir buzaýly sıyryn, 4-5 qoı bergen. Ol ákesiniń osy isin úlgi tutyp, jerlesterine kómek kórsetýdi jón sanady.

- Ot pen sý - tilsiz jaý. Sý bir-aq kúnde keldi. Qar kóp boldy, toń qalyń, nóser jaýyn da jaýdy. Qazir bári artta qaldy. Endi zardap shekkenderge qoldaý kórsetý kerek, - dedi ol.