Aqtóbelik kásipker ózine beıit salyp, eskertkish ornatyp alǵan
AQTÓBE. KAZINFORM – Aqtóbelik kásipker Qýandyq Álishev eki jyl buryn qala irgesindegi qorymnan oryn alyp, eskertkish músinin turǵyzyp qoıdy. Ol muny qatty aýyrǵan soń oılastyrǵanyn aıtady.
Aqtóbe qalasy Kirpishti turǵyn alaby mańynda úlken qorym bar. Munda qazaqtarmen qatar ózge etnos ókilderi de jerlengen. Kireberistiń sol jaq bóliginde ornalasqan eskertkish músin 2022 jyly salynǵan. Ákimshilik zırattyń kásipker Qýandyq Álishevke tıesili ekenin biledi.
- 2022 jyldan bastap saldy. Úlken kisi eken. Aldyn ala kórgisi kelgen shyǵar qandaı bolatynyn. Bar bolǵany 2-3 aıda salyp boldy. Tek ózine ǵana arnalǵan. Granıt tasty qoldanyp tur. Munda buǵan deıin dál osylaı daıyndap qoıǵan adam boldy. Biraq ol kisi qaıtys bolyp, jerlendi. Negizi mundaıdy úlken kisiler jasaıdy. Olarǵa tyıym sala da almaısyń. Oryn satylmaıdy, - dedi Kishpishti turǵyn alabyndaǵy orys zıratynyń ákimshisi Sábıt Dúısenov.
Onyń aıtýynsha, negizi adamdar qaıtys bolǵany týraly anyqtama ákeledi. Sodan keıin ǵana oryn beriledi. Jer tegin berilgenimen, mundaǵy qabir qazý qyzmeti 90 myń teńge turady.
Tiri kezinde zırattan oryn alyp, beıitin salǵan kásipker oń jaǵyna tasqa qashatyp «Baqytty ómirdiń belgisi: Abyroı, bala-urpaqtaryń», al sol jaǵyna «Tynymsyz izdený, mazasyz tirlik - muratyń» dep jazdyrǵan.
- Men 86 jastamyn. Osydan eki jyl buryn qańtarda qulap, belim synyp qalyp, jattym. Sol kezde óz balalarymdaı bolǵan bastyqtar kelip, densaýlyǵymdy surady. «Aǵalaryńnyń ólip qalatyn túri bar, júre almaıdy. Almatyda balalarym, inilerim, jaqyn dostarym kóp. Jer berseńder, solar barlyǵyn jasap beredi» dep aıttym. Al zırattyń ornyn qyrdyń ústinen ózim tańdap aldym. Jer bergen kisilerdi kinálaıtyn eshteńe joq. Suraǵan men kináli. Men saldym, - dedi kásipker Qýandyq Álishev.
Ol beıitke qoıatyn eskertkish músinniń úlgisin ózi tańdap, ózi bekitken.
Aıta keteıik, Qýandyq Álishev – Aqtóbe oblysy Temir aýdanynyń týmasy. Almaty zootehnıkalyq-mal dárigerlik ınstıtýtynda bilim alyp, ǵylymı eńbekter jazǵan. Qarakól qoıy qozysynyń erekshe tústi eltirisin alý jolyn usynǵan. Túrli jyldary spırt zaýyty, shoshqa fermasy, qus tsehy boldy. Qazirgi kezde kópqabatty úı salyp jatyr.
Eske salsaq, Mádenıet jáne aqparat mınıstrligi monýmenttik óner qurylystaryn ornatý qaǵıdalaryna ózgertý engizbek. Adamǵa kózi tirisinde qandaı jaǵdaıda eskertkish qoıylady? Bul saýaldyń jaýabyn myna siltemeden taba alasyz.
