Aqtóbelik kásipker Eldos Smetovti quttyqtap, 100 jylqy atady
AQTÓBE. KAZINFORM — Aqtóbelik kásipker Anýar Mahanov dzıýdodan Olımpıada chempıony Eldos Smetovke telefon shalyp quttyqtap, aýylǵa shaqyrdy. Ol chempıonǵa 100 jylqy atady.
Aqtóbelik kásipker Parıjde ótip jatqan jazǵy Olımpıadany otbasy bolyp tamashalap, Eldos Smetovke jankúıerlik etti. Buǵan deıin qola, kúmis medal taqqan dzıýdoshynyń bul joly chempıon atanatynyna sendi.
— Ózim sport jankúıerimin, Olımpıadalardy úzbeı qaraımyn. Eldos osy jazǵy Olımpıadada birinshi oryn alady dep úmittendim. Úmit aqtaldy. Ózim Eldos Smetovtiń telefon nómirin taýyp alyp, habarlastym, aýylǵa kelýin suradym. Oǵan 100 jylqy ataǵan jaıym bar. Baıǵanın aýdany, Jarqamys aýylyna aparamyn. Olımpıada chempıonyn aýyl balalarynyń da kórgenin qalaımyn. Chempıondar aýyldan shyǵady. Men dzıýdoshyny júzbe-júz tanymasam da onyń jetistikterin bilemin. Ári Olımpıadanyń alǵashqy kúni-aq eldi qýantty. Búkil qazaqty dúr silkindirdi. Ol árdaıym aǵalary bar ekenin bilip júrse deımin. Sporttan qol úzbeı, óziń sekildi chempıon tárbıele dep buıymtaıymdy aıttym, — dedi kásipker Anýar Mahanov.
Aıta keteıik, kásipker Jem boıynda qazaqy jaby tuqymdy jylqy sharýashylyǵyn damytyp otyr. Chempıonǵa ataǵany da asyl tuqymdy jylqy.
— Meniń baǵyp otyrǵan jylqym meniki emes, eldiń qýanyshyna, jaqsylyǵyna arnalǵan. Ózim aýyldaǵy sport mektebindegi úıirmege qatysyp, jeńimpaz bolyp júrgen balalardy da qoldap otyramyn. Marqum ákem Aqmyrza Mahanov ta 1976 jyly erkin kúresten Keńes odaǵynyń chempıony bolǵan. Balalarym da sportqy qyzyǵady. Úlkeni fýtbolshy bolýdy armandaıdy, — dedi kásipker.
