Aqtóbelik ınspektorlar úsh aı boıy kıik úrkitti
AQTÓBE. KAZINFORM — Aqtóbeniń Áıteke bı aýdanynda 10 mobıldi top egin alqaptaryn kúzetti. Inspektorlardyń mindeti kıikti úrkitý boldy.
«Ohotzooprom» ÓB» RMQK-nyń ınspektorlary, Yrǵyz-Torǵaı memlekettik tabıǵı rezervatynyń ınspektorlary, oblystyq orman sharýashylyǵy jáne janýarlar dúnıesi aýmaqtyq ınspektsııasy mamandary men sharýashylyq jumysshylary kúzetti birge atqardy. Inspektorlar 15 kún saıyn almasyp, jumys istedi.
— Kıik egin, shabyndyq, jaıylym jerdi taptap ketpes úshin aýmaqtar qorǵaldy. Kóktemde aýdan ákimdigi, onyń ishinde aýyl sharýashylyǵy bóliminiń ótinishimen Áıteke bı aýdanynyń 8 sharýa qojalyǵynyń jerin mamandar kúzetti. Sonymen birge sharýalar da tehnıka, jumysshylaryn bóldi. Kúzet 1 tamyzǵa deıin jalǵasty. Tamyzdan bastap egin orý jumysy bastalyp, tehnıka kirdi. Odan keıin biz júre almaımyz, — dedi oblystyq orman sharýashylyǵy jáne janýarlar dúnıesi aýmaqtyq ınspektsııasynyń basshysy Ádilkereı Áýelbaev.
Aıta keteıik, Betpaqdala popýlıatsııasynyń Aqtóbe oblysy aýmaǵynda 300 myńnan astam kıik bar. Ol Yrǵyz-Torǵaı memlekettik tabıǵı rezervaty ornalasqan Yrǵyz aýdany jáne Áıteke bı aýdany aýmaǵyn qamtıdy.
— Áıteke bı aýdanynda 5 aýyldyq okrýgtegi sharýa qojalyqtarynyń aýmaǵyn 10 mobıldi top kúzetti. Olarda 14 tehnıka boldy. Inspektorlar men jumysshylar 15 kún saıyn vahtalyq ádispen aýysyp otyrdy. Kúzet mamyr aıynda bastalyp, tamyzǵa deıin jalǵasty. Dán seýip, oraq túskenge deıingi kezeńde jumys istedi. Aýdanda 166 myń gektar egis alqaby bar, — dedi Áıteke bı aýdany ákiminiń orynbasary Daýren Ýbaıdýllın.
Eske salsaq, mamyr aıynyń basynda Aqtóbe oblysy Áıteke bı aýdanyndaǵy «Qumqudyq» JShS-niń dırektory Aleksandr Chemodanov egis alqabyna kıik kirgenin aıtyp, kómek surady.
Sol kezde 395 gektar bıdaı, 746 gektar kópjyldyq erkekshóp alqaby taptalǵany belgili boldy.