Aqtóbelik emshi Baıan Alagózova men Dınara Sátjanǵa jala japqany úshin aıyppul tóleıdi
AQTÓBE. KAZINFORM — Emshi Baǵdagúl Lepesovaǵa qatysty is Ákimshilik quqyqbuzýshylyq týraly kodekstiń «Jala jabý» baby boıynsha qaraldy. Quqyq buzýshy aıypty dep tanylyp, oǵan 1,5 mln teńge aıyppul salyndy.
Іs Aqtóbe qalasynyń ákimshilik quqyqbuzýshylyqtar jónindegi mamandandyrylǵan aýdanaralyq sotynda qaraldy. Aqtóbe qalalyq polıtsııa basqarmasy ýchaskelik polıtsııa ınspektory Ulan Esjanovnyń aıtýynsha, bıyl 15-mamyr kúni E-ótinish portaly arqyly Baıan Alagózova men Dınara Sátjannan Baǵdagúl Lepesovaǵa qatysty aryz tústi. Bir kúnnen soń qorǵaýshylary ınspektorǵa beınejazbany usynady.
Baǵdagúl Lepesovanyń ózi bul kezde Astanada qalasynda bolyp, 25 mamyr kúni Ákimshilik quqyqbuzýshylyq týraly kodekstiń 73-3-baby 2-bóligine sáıkes hattama toltyryldy. Keıin is qujattary, ıaǵnı, beınematerıal sot saraptamasyna jiberiledi. Saraptama qorytyndysy boıynsha «jala jabý» deregi rastalady. Іs 20-shilde kúni sotqa joldanady.
Sot otyrysynda quqyq buzýshy Baǵdagúl Lepesova ózine taǵylǵan aıyppen kelispedi, paraqshasyna mundaı vıdeo salmaǵanyn aıtty.
— Meniń óz álemim bar. Bul kisiniń álemin men túsinbeımin. Ózime taǵylǵan aıyptyń eshqaısysyn moıyndamaımyn. Vıdeo meniń paraqshamda tur ma? Joq. Meniń paraqsham bolmasa bul kisilerge qalaı jaýap beremin? Myna jerdegi meniki emes. Bireýler úshin jaýap bere almaımyn, — dedi Baǵdagúl Lepesova.
Onyń qorǵaýshysy da sotta beınejazbalardyń montaj bolýy nemese JI paıdalaný arqyly jasalýy múmkin degen negizdi ýáj keltirilgenin aıtty. Ári saraptama qorytyndysyn zańsyz dep tanýdy, beınejazbany jarııalaǵan eki akkýant ıesin taýyp, sotta jaýap alýdy surady.
Talapker Baıan Alagózova sotqa onlaın qatysty. Ol beınejazba óziniń ar-ojdanyna tıgenin, keshirim bermeıtinin, medıatsııalyq kelisimge kelmeıtinin aıtty.
— Biz quqyqtyq memlekette turamyz. Qazaqstan azamatynyń ar-ojdanyn qorlaýǵa, kemsitýge bolmaıdy. Meni qorlady, kemsitti. Munyń bárin tyńdap otyrýǵa laıyqty emespin. Barlyq portaldan kórdim. Osy sebepti tipti TikTok akkýantty óshirip tastadym. Tulǵa, adam retinde eńseńdi ezip jiberedi. Esirtkige táýeldi, memleketten aqsha alyp, jigitterdi jaldaıdy, aqshany óz qajettiligine jumsaıdy dep aıtqan. Kóp qorlap, jala japty. Men ádil sheshim shyǵaryp, Lepesovany jazalaýdy suraımyn. Kez kelgen saraptama, tipti qarapaıym adam munyń JI emes ekenin dáleldeıdi. Onyń keshirim suraǵany kerek emes, keshirmeımin. Medıatsııalyq kelisimge barmaımyn. Bul barlyǵyna sabaq bolsa eken deımin. Qazir ınternette adamdardy qorlap, kemsitedi. Al biz quqyqtyq memlekette turamyz. Osy sot arqyly basqalar da áleýmettik jelide eshkimdi qorlaýǵa jol berilmeıtinin kórýi kerek, — dedi ol.
Sot qaýlysy boıynsha Baǵdagúl Lepesova aıypty dep tanyldy.
— Baǵdagúl Lepesova Ákimshilik quqyqbuzýshylyq týraly kodekstiń 73-3 baby 2 bóligi boıynsha kináli dep tanylsyn. Ákimshilik quqyqbuzýshylyq týraly kodekstiń 58-babyna saı túpkilikti 1 557 000 teńge ákimshilik aıyppul salynsyn. Aıyppul 30 táýlikten keshiktirilmeı tólenýi tıis, — dedi sýdıa Anar Aıtjanova.
Aıta keteıik, Baǵdagúl Lepesovaǵa qatysty qylmystyq is te tirkelgen. Іs Astana qalasynda Qylmystyq kodekstiń «Qorlaý» baby boıynsha qaralyp jatyr.
Eske salsaq, elimizde polıtsııa áleýmettik jeli sóz arqyly beıádep sóz aıtqan adamdardy anyqtap, jazalap jatyr. Shymkentte er adam 10 táýlikke qamaýǵa alyndy.
Qyzylorda oblystyq Polıtsııa departamenti de áleýmettik jelilerge monıtorıng júrgizdi.
