Aqtóbelik depýtattardyń avtogaz beketin tekserý usynysy qoldaý tappady
AQTÓBE. KAZINFORM – Usynys Kásipkerler quqyqtaryn qorǵaý jáne sybaılas jemqorlyqqa qarsy is-qımyl jónindegi keńeste qaraldy. Alaıda Kásipkerlik kodeksiniń 144 babyna sáıkes tekserý júrgizilmeıtini týraly aıtylyp, taǵy da eske saldy.
Aqtóbe qalalyq máslıhat depýtattary avtogaz quıý stansalaryn tekserý týraly usynys aıtty. Al oblystyq suıytylǵan gaz jetkizýshiler qaýymdastyǵy oǵan qarsy shyǵyp, kásipkerler palatasynan kómek surady. Kásipkerler quqyqtaryn qorǵaý jáne sybaılas jemqorlyqqa qarsy is-qımyl jónindegi keńestiń múshesi, quqyqtyq statıstıka jáne arnaıy esepke alý organdarynyń ókili Qundyz Seıitbattal Kásipkerlik kodeksiniń 144 babyna sáıkes zań buzýshylyqtar tirkelse jáne prokýratýranyń sanktsııasy bolsa ǵana tekserý júrgizilýi múmkin ekenin aıtty.
- Basqa aımaqtaǵy qaıǵyly oqıǵa kásipkerlerge qysym kórsetýge negiz bola almaıdy. Zań buzýshylyqtar týraly naqty aqparat bolmasa úshinshi tulǵalardyń, tipti depýtattardyń bastamasy tekserýlerge sebep bola almaıdy, - dedi Qundyz Seıitbattal.
Aqtóbe oblysynda 2023 jyly aýqymdy tekserý bolǵan. Sol kezde avtogaz quıý stansalarynda qaýipsizdik normalarynan aýytqý deregi tirkelmedi, barlyq stansada ruqsat qujaty boldy.
- Biz qaýipsizdik pen profılaktıkany qoldaımyz. Biraq salanyń turaqty jumysyna qaýip tóndiretin tekserý qajet emes. Árbir stantsııa ol - jumys orny, salyq túsimi, logıstıka jáne halyqty otynmen qamtamasyz etý kózi. Negizsiz tekserý bolsa gaz tapshylyǵynan bastap áleýmettik shıeleniske ákelýi múmkin, - dedi Aqtóbe oblysy boıynsha bıznes-ombýdsmenniń ýákiletti ókili, Kásipkerler palatasy dırektorynyń orynbasary Rýslan Kýıshınov.
Eske salsaq, Atyraýdaǵy avtogaz beketinde bolǵan jarylystan soń aqtóbelik depýtattar tekserý týraly usynys aıtty. Jalpy elimizde 3 myńǵa jýyq janar-jaǵarmaı stansasy, 2500 avtogaz quıý stansasy bar. Olardyń jumysyn TJM Ónerkásiptik qaýipsizdik komıteti qadaǵalaıdy. Alaıda qazir Kásipkerlik kodeksi kez kelgen ýaqytta tekserýge qolbaılaý bolyp tur. 2026 jyldyń 1 qańtarynan bastap bul shekteý joıylady.