Aqtóbelik dárigerler ýaqytyly em júrgizbegeni úshin balanyń ata-anasyna 10 mln teńge tóleıdi
AQTÓBE. KAZINFORM – Aqtóbelik dárigerler qaınaǵan sýǵa kúıip qalǵan 5 jastaǵy qyzdyń ata-anasyna 10 mln teńge moraldyq, 1 mln teńge materıaldyq shyǵyn tóleıdi. Olar der kezinde tıimdi em júrgizbegen.
Aqtóbe oblysynyń kámeletke tolmaǵandar isteri jónindegi mamandandyrylǵan aýdanaralyq sotynda azamattyq is qaraldy. Іs materıalyna súıensek, 2019 jyly týǵan qyz byltyr maýsym aıynda qaınap turǵan sýǵa kúıip qalǵan. Onyń bóksesi, jambasy jáne aıaǵy kúıip, jedel járdemmen aýrýhananyń jansaqtaý bólimine jetkizildi.
Termııalyq kúıik kólemi — 26-28% quraıdy. Sol kezde aýtodermoplastıka otasy jasalýy tıis edi. Alaıda qajetti apparattyń, atap aıtqanda dermatom apparatynda batareıanyń qýaty bolmaǵan. Talap qoıýshy aýrýhanadan shyǵyp, Reseı, Túrkııa jáne Almaty qalalaryndaǵy aýrýhanalarǵa júginýge májbúr boldy. 2023 jyldyń 26 shildesinde Orynbor qalasynda ota jasaldy. Balaǵa 7 jasqa deıingi múgedektik belgilendi.
— Talap qoıýshy aýrýhanada kúıikke qarsy tósek, kóp komponentti jaqpa, operatsııa jasaý úshin dermatom apparatyna arnalǵan batareıalardyń bolmaǵanyn, balaǵa aýyrsynýdy basatyn dári bermeı, tańý júrgizilgenin aıtyp, materıaldyq jáne moraldyq zııandy óndirip alý týraly aryzben sotqa júgindi. Sotta balalar ortoped-travmatologi kúıik aımaǵy ómirge qaýipti ekenin túsindirdi. Eger operatsııa ýaqtyly jasalmasa, tyrtyq qalyp, múgedektikke ákeletinin aıtty. Sot sapasyz qyzmetti eskere otyryp, jaýapkerden 10 mıllıon teńge moraldyq jáne 1 098 823 materıaldyq zalal óndirdi. Sot sheshimi zańdy kúshine engen joq, — dep habarlady Aqtóbe oblysynyń kámeletke tolmaǵandar sýda jónindegi mamandandyrylǵan aýdanaralyq sotynyń baspasóz qyzmeti.
