Aqtóbelik belsendi jastar aýyldy saqtap qalýdyń úlgisin kórsetti
AQTÓBE. KAZINFORM – Qobda aýdany Begaly aýylynyń jastary Aqtóbe qalasynda turatyn kópbalaly otbasylardy aýylǵa kóshirip apardy. Bul mektepti, jalpy aýyldy saqtap qalýǵa arnalǵan qadam.
Aqtóbe oblysy Qobda aýdany Begaly aýylynda qazir 65 úı bar. Begaly negizgi mektebinde 47 oqýshy bilim alyp júr. Aýylda mektep ǵımaraty ishinde balabaqsha da ornalasqan. Qazirgi kezde bul bilim ordasyn saqtap qalýǵa arnalǵan eń negizgi qadam. Sonymen birge bir kezderi osy aýylda turǵan jastar qazir týǵan aýylyn saqtap qalýdyń ozyq úlgisin kórsetip tur. Belsendiler birneshe kópbalaly otbasyny aýylǵa kóshirip apardy.
- Ózim Begaly aýylyndaǵy mektepte bilim aldym. Ol kezde oqýshy kóp edi. Aýyl da gúldep turdy. Ýaqyt óte kele adam sany, oqýshylar azaıdy. Kórsek, júregimiz aýyrady. Aýyldy sol qarpyna qaıtaryp, saqtap qalý úshin úlkenderimiz, jastar bas qosyp, keńes ótkizdik. Jan-jaqta júrgen jastar birigip, aqsha jınady. Aýyldaǵy adamdar mal berdi. Birliktiń arqasynda eki úı satyp alyp, ony jóndedik. Sóıtip kópbalaly eki otbasyn kóshirip ákeldik. Balalar mektepte oqıdy, balabaqshada tárbıelenedi, - dedi aýyl belsendisi Jeńisbek Enshibaı.
Aýyldan uzap ketken jastardy úlkender qoldap, qazir bastama kúsh ala tústi. Buǵan mektep ákimshiligi dán rıza. Sebebi 320 oryndyq mektepti saqtap qalý – ortaq maqsat.
- Bıylǵy oqý jylynda 7 bala keldi. Bárine de mektepte tegin ystyq tamaq beriledi. Sonymen birge oqý jyly bastalǵanda qajetti qural-jabdyqpen qamtyldy. Bir ata-ana mektepte jumys isteıdi, - dedi Begaly negizgi mektebiniń dırektory Jaınagúl Daýlova.
Aýyl adamdarynyń shaqyrýymen kelgen eki otbasynyń balalary da qazir jańa ortaǵa úırendi. Al olardyń ata-analary páter jaǵalap júrgennen, aýylda turǵan áldeqaıda jaqsy dep otyr.
- Begaly aýylyna kóship kelgenimizge 3 aıdyń júzi boldy. Eki balam mektepte, ózgeleri balabaqshada. Ózim jumysqa ornalastym. Aýyl tynysh, adamdary jaqsy. Úırenip kettik, «Úı tańdama, kórshi tańda» dep aıtatyn buryn. Kórshilerim jaqsy, úsh aı bolsa da osynda burynnan turatyn adam sııaqtymyn, - dedi Balbıke Temirbaeva.
Eske salsaq, elimizde 20 jylda 1,4 myń aýyl joıylyp ketti.