9 mln-ǵa baǵalaǵan - Aqtóbelik azamat óziniń ishki aǵzasyn satpaq bolǵan
AQTÓBE. KAZINFORM – Aqtóbe prokýratýrasy áleýmettik jelige taldaý júrgizip, óz aǵzasyn satpaq bolǵan adamdy anyqtady. Qazir kúdikti ustalyp, qylmystyq is qozǵaldy.
Aqtóbe oblysy prokýratýrasynyń baspasóz qyzmetiniń habarlaýynsha, E. esimdi azamat áleýmettik jelige óziniń ishki aǵzasyn satatynyn jazyp, habarlama qaldyrǵan. Keıin prokýratýra qyzmetkerleri sol habarlama ıesin izdep, tapty.
- 2024 jyldyń 25 qyrkúıeginde prokýratýranyń bastamasymen júrgizilgen jedel-izdestirý is-sharasy aıasynda Uıymdasqan qylmysqa qarsy kúres basqarmasynyń qyzmetkerleri óziniń ishki aǵzalaryn 9 mln teńgege zańsyz mámile jasaý arqyly satpaqshy bolǵan E. esimdi azamatty ustady,- dep habarlady Aqtóbe oblysy prokýratýrasynyń baspasóz qyzmeti.
Qazirgi kezde osy isten soń Qylmystyq kodekstiń 116-babynyń 1-bóligimen, ıaǵnı «Adamnyń aǵzalary men tinderin alyp qoıýǵa májbúrleý nemese zańsyz alyp qoıý» babymen sotqa deıingi tergep-tekserý bastaldy.
Aıta keteıik, Qazaqstanda aǵza satý isi boıynsha qylmystyq jaýapkershilik qarastyrylǵan.
Al Aqtóbe oblysy boıynsha qazir óńirde 300-den astam adam búırek, baýyr aýystyrýdy qajet etedi. Alaıda 6 jyldan beri máıittik donor otasy toqtap tur.
