Aqtóbelik azamat ilmek pen jipten túrli buıym toqıdy
AQTÓBE. KAZINFORM – Balalar úıinde tárbıelengen Temirhan Imanǵazın qazir ilmekpen túrli buıym toqıdy. Sheber Naýryz merekesinde tapsyrystyń arta túskenin aıtty.
Temirhan Imanǵazın burynǵy Alǵa balalar úıinde tárbıelendi. Balalar úıinde júrip-aq 10 jastaǵy jasóspirim eńbek páni muǵaliminiń úıretkenin ilip alyp, ilmekti serik etti. Alǵashynda shaǵyn dúnıeler, keıin sándi bas kıim, moıyn shalǵy toqydy.
— Toqyǵan kezde adamnyń jany tynyshtalady. Júıkege salmaq tússe, toqyp, oıǵa shomylǵan unaıdy. Muny qyzdardyń isi deıtinder de tabylady, aıtylady. Oǵan mán bermeýge tyrysamyn. Árıne, alǵashynda «durys emes shyǵar» dep oıladym. Biraq er balalar da tigip, toqı alady. Ózim túrli, qanyq tústerdi unatamyn. Buıymdardy toqyǵan kezde de túrli tústi qoldanamyn. Qazir tapsyrystar túsip jatyr, - dedi Temirhan Imanǵazın.
Ol alǵashynda ustazynan tálim alsa, qazirgi kezde áleýmettik jelini paıdalanady. Oıy zerek sheber beınesabaqtardy kórip-aq aına qatesiz qaıtalap toqıdy, keıde óziniń oıyna erik beredi.
Qolóner sheberi qazir «Meıirim» jastardy áleýmettik beıimdeý ortalyǵynda turady, turaqty jumysy da bar. Toqý hobbıi, biraq kásipke aınaldyrǵysy keledi.
— Naýryz merekesine oraı bas kıimge tapsyrys tústi. Negizgi jumysymdy jasap kelemin, keıin toqyp otyramyn. Bir bas kıimdi 30 mınýtta, keıde 1 saǵatta toqyp shyǵamyn. Aldaǵy ýaqytta úılenip, kelinshegime, qyzdy bolsam, qyzyma úıretkim keledi. Tipti tájirıbe jınap, aıaq kıim, sháli, túrli kıim toqyǵym keledi. Sóıtip shaǵyn dúken de ashpaq oıym bar, - dedi Temirhan Imanǵazın.
«Meıirim» jastardy áleýmettik beıimdeý ortalyǵynyń pedagog uıymdastyrýshy Darııa Abdýllınanyń aıtýynsha, Temirhan Imanǵazın óte meıirimdi, aqqóńil ári sportpen de shuǵyldanady. Ortalyqta 44 tárbıelenýshi bolsa, onyń 11-i stýdent, qalǵany jumys isteıtin jastar.
Buǵan deıin Aqtóbede 90 jastaǵy áje is tigip, tary qaınatatynyn jazǵan bolatynbyz. Batyr ana Bıbijan Kádirbaıqyzy 36 jasynda jesir qalyp, 9 balany ózi jetkizdi. Bar bolǵany 7 synyp oqyp, 20 jyl boıy qoı baqqan.