Aqtóbelik áıeldi balasymen qosa qaǵyp ketken júrgizýshi 2 jylǵa sottaldy
AQTÓBE. KAZINFORM – Aqtóbede 3 jasar qyzdyń ólimine ákep soqqan jol-kólik oqıǵasyna qatysty sot úkimi shyqty. Júrgizýshi 2 jylǵa bas bostandyǵynan aıyryldy.
Aqtóbe qalasynyń №2 sotynda júrgizýshige qatysty istiń úkimi shyqty. Oǵan Qylmystyq kodekstiń 345-baby 3-bóligimen aıyp taǵyldy.
Іs materıalyna súıensek, «GAZ 3302» markaly avtokóliginiń júrgizýshisi jyldamdyqty asyryp jibergen. Jaıaý júrginshiler ótkelin kórgenimen, júrginshige jol bermegen. Saldarynan áıel adamdy balasymen qosa qaǵyp ketken. 3 jasar qyz kóz jumyp, anasy aýyr hálde aýrýhanaǵa jetkizildi.
Sot otyrysy kezinde sottalýshy taǵylǵan aıypty moıyndap, bas bostandyǵynan aıyrmaıtyn jaza taǵaıyndaýdy surady. Jábirlenýshi 30 mln teńge moraldyq zııan óndirý týraly talap aryzdarynan bas tartyp, sottalýshyny keshiretinin, keltirilgen zalaldyń óteýi retinde 10 mln teńge berilgenin kórsetip, sottan bas bostandyǵynan aıyrmaıtyn jaza taǵaıyndaýdy surady.
- Sot úkimimen sottalýshy Qylmystyq kodekstiń 345-baby 3-bóligimen kózdelgen qylmysty jasaǵany úshin kináli dep tanylyp, oǵan 5 jylǵa kólik quralyn basqarý quqyǵynan, 2 jyl merzimge bas bostandyǵynan aıyrý jazasy taǵaıyndaldy. Sot úkimi zańdy kúshine engen joq, - dep habarlady Aqtóbe qalasy №2 sotynyń baspasóz qyzmeti.
Eske salsaq, bıyl 11 qyrkúıek kúni Aqtóbe qalasynyń Ońtústik aınalma jolynda qaıǵyly oqıǵa boldy. GAZel kóliginiń júrgizýshisi áıel adamdy balasymen birge qaǵyp ketti.
