Aqtóbelik aýdıtorlar jumys istemegen kúnderine de jalaqy alǵan qyzmerkerlerdi anyqtady
AQTÓBE. KAZINFORM – Jaısań arnaıy bilim berý uıymynda qyzmetkerler jumys istemegen kúnderine de jalaqy alyp kelgen. Al Muǵaljar aýdanynda ákimdik 5 aýyldy ınternetpen qamtý úshin aqshany aldyn ala bólip, jumys kesh iske asyrylǵan.
Aqtóbe oblysy boıynsha Іshki memlekettik aýdıt departamenti alǵashqy jartyjyldyqty qorytyndylady. Jyldyń alǵashqy 6 aıynda 91 aýdıtorlyq tekserý júrgizdi.
- Alǵashqy jartyjyldyqta 418 mlrd teńgege jýyq somanyń 16 238 loty men jospar tarmaqtary qamtyldy. Barlyǵy 2 406 lot boıynsha 43 mlrd teńgege buzýshylyqtar ańyqtaldy. Departament habarlamalardy ýaqtyly nemese tıisti túrde oryndamaǵany úshin Ákimshilik quqyqbuzýshylyq týraly kodekstiń 462 baby 3-bóligine sáıkes 8 laýazymdy tulǵaǵa qatysty 12 hattama toltyryp sotqa jiberdi. Barlyq hattama boıynsha laýazymdy tulǵalar kináli dep tanylyp, aıyppul salyndy. Sonymen birge departamentke «E-Ótinish» aqparattyq júıesi arqyly barlyǵy 1580 ótinish kelip tústi, - dedi Aqtóbe oblysy boıynsha Іshki memlekettik aýdıt departamentiniń basshysy Sáken Qasymov.
Derekterge súıensek, Aqtóbe oblystyq bilim basqarmasyna qarasty Jaısań arnaıy bilim berý uıymynda qyzmetkerler jumys istemegen kúnderi úshin de jalaqy alyp otyrǵan. Shyǵyn 19 mln teńgege jýyqtaıdy. Tekserýden soń mekeme basshysy, dırektordyń oqý isi jónindegi orynbasary jáne bas esepshi tártiptik jaýapqa tartylyp, aqsha túgel bıýdjetke qaıtaryldy.
- Tekserý kezinde Muǵaljar aýdany Aşysaı aýyldyq okrýginiń Sabyndykól, Aşysaı, Aqsý aýyldarynda jáne Q.Jubanov atyndaǵy aýyldyq okrýgi Qarakól jáne Jańaturmys aýyldarynda GPON tehnologııasynyń talshyqty-optıkalyq baılanys jelilerin salý jumystary oryndalmaǵan bolyp shyqty. Ol úshin ákimdik 69, 5 mln teńge bólip qoıǵan. Búgingi kúnde talshyqty-optıkalyq ınternet jelilerin júrgizý jumysy tolyq aıaqtaldy. Al Mártók aýdandyq turǵyn úı-kommýnaldyq sharýashylyǵy, jolaýshylyr kóligi jáne avtomobıl joldary bólimi Shevchenko, Qyzyljar, Martýk, Dmıtrıevka, Dostyq aýyldaryna kireberis jolynda arka jasaý jáne ornatýǵa tapsyrys bergen. Qarap, tekserý kezinde Mártók jáne Dostyq aýyldaryna kireberis jerde arkanyń jarty qańqasy ǵana ornatylǵany anyqtaldy. Al qalǵan aýyldarda arka ornatylmaı, 2,8 mln teńge merdigerge aýdarylǵan. Іs boıynsha talap aryz sotqa joldandy. Sotta qaralyp jatyr, - dep habarlady Sáken Qasymov.
Sondaı-aq aýdıtorlyq tekserý kezinde quryltaıshynyń ruqsatyn almaı Álııa Moldaǵulova halyqaralyq áýejaıy dırektorlar keńesiniń basshysyna páter jaldaý úshin 4 mln teńge aýdarylǵan. Qarjyny bıýdjetke qaıtarý úshin Aqtóbe oblystyq mamandandyrylǵan aýdanaralyq ekonomıkalyq sotqa talap aryz berildi.
