Aqtóbelik áskerı ushqysh: tasqynda bastysy adamdardy qutqarý boldy
AQTÓBE. KAZINFORM – Keńes Odaǵynyń eki márte batyry Talǵat Bıgeldınov atyndaǵy Áýe qorǵanysy kúshteri Áskerı ınstıtýtynyń túlegi, leıtenant, aǵa nusqaýshy ushqysh Álı Orynbaev tikushaqpen 200 saǵat ushqan. Áýe ushqyshtary úshin bul - aıtarlyqtaı kórsetkish. Agenttik tilshisi jas ushqyshpen áńgimelesken edi.
«Áskerı bolýdy bala kúnimnen armandadym. Meniń ákem - áýe qorǵanysy kúshteri áskerı ınstıtýtynyń 2001 jylǵy túlegi, ákemniń izin qýyp 2019 jyly áýe áskerı oqý ornyna túsip, 2023 jyly memlekettik tikushaq avıatsııasy mamandyǵyn meńgerdim. Anam da osy áskerı salada qyzmet etedi. Bıyl bizdiń qyzmet sý tasqyny kezinde qyza tústi. Tasqynnyń alǵashqy kúninen bastap bizdiń ekıpaj evakýatsııalaý sharalaryna belsene aralasty. Sý shaıǵan alys-jaqyn eldi mekender turǵyndaryn, sonymen qosa dúnıe-múlkin qaýipsiz jerge jetkizdik. Sonymen qatar jaıaý, kólikpen jetý múmkin emes eldi mekenderge gýmanıtarlyq kómekti tikushaqpen tasydyq. Bizdiń basty maqsat – sý tasqyny kezinde adamdardy qutqarý boldy», - dedi Álı Orynbaev Qorǵanys mınıstrliginiń uıymdastyrýymen ótken BAQ ókilderine arnalǵan baspasóz týry barysynda.
Jas áskerı ushqyshty oqýdy bitire sala Shymkent áskerı avıatsııalyq bazasyna tájirıbe jınaýǵa jibergen. Bıyl maýsym aıynan beri týyp-ósken ólkesi Aqtóbede qyzmet etip júr.
«Qazir ınstıtýt kýrsanttary men ofıtserlerin praktıkalyq turǵydan úıretemin. Al áskerı avıatsııany tańdaǵan sebebim, bul jerde biz adam ómirin qutqaramyz, odan bólek adamdarǵa gýmanıtarlyq basqa kómek kórsetemiz. Kelisimshartqa sáıkes men 15 jyl áskerı avıatsııa salasynda qyzmet etýge mindettimin jáne odan ári jalǵastyrýǵa nıettimin», - deıdi ol.
Onyń aıtýynsha, ushqyshtarǵa tán qasıetter – tez sheshim qabyldaý, ustamdylyq jáne maqsatqa jetý. Sondaı-aq, jas ushqysh bolashaqta áýe qorǵanysy kúshteriniń bas qolbasshysy bolǵysy keletinin de aıtyp qaldy.
Eske salsaq, Aqtóbe oblysy - bıyl kóktemde tasqynnan zardap shekken óńirlerdiń biri.
