Aqtóbelik ana balasynyń qolyn syndyrǵan jasóspirimniń jazalanýyn talap etti
AQTÓBE. KAZINFORM — Balaǵa ota jasalyp, synǵan súıegi symmen bekitildi. Polıtsııa Qylmystyq kodekstiń «Densaýlyqqa qasaqana aýyrlyǵy ortasha zııan keltirý» baby boıynsha is qozǵady.
Aqtóbe qalasynyń turǵyny Aqjan Kárim balasyn joǵary synyp oqýshysy uryp, tipti qol súıegin syndyryp jibergeni týraly aıtty. Oqıǵa 6 qazan kúni mektep aýlasyndaǵy fýtbol alańynda bolǵan. 5-synyp oqýshysy Aısultan Kárim tústen keıin sabaqtan shyǵyp, oınaýǵa barady. Sol kezde 10-synyp oqýshysy olarǵa dereý alańnan shyǵýdy buıyrady. Alaıda balalar oıyndy ári qaraı jalǵastyryp, joǵary synyp oqýshysy kelgen sátte birin ıterip, keıin ıyǵy men aıaǵynan tebedi.
— Joǵary synyptyń qyzdary men balalary bolsa oınap, kúlip sol fýtbol alańynda otyrady. Tepken oqýshynyń qasyndaǵy dostary «ana balany úıine apar, jedel járdem shaqyr» dep qoımaǵan soń meniń ulymdy ornynan turǵyzyp, synǵan qolyn odan saıyn burap, kóterip, salystyryp kóredi. Ony ózi de moıyndap otyr. Sóıtip balam úıge keledi. Jedel járdem shaqyramyz. Aýrýhanaǵa túskende «qoly synǵan» dep aıtty. Balama bir emes, birneshe ota jasalyp, qolyna medıtsınalyq sym salyndy. Operatsııa jasalǵan kúnniń erteńine kináli bala men onyń anasy aýrýhanaǵa barady. Meniń ruqsatymsyz kirip, kezdesken. Ony qalaı kirgizip otyr? № 1 qalalyq polıtsııa bóliminde is qozǵaldy. Biraq qazirgi tańda burmalanyp jatyr, jyly japqysy keledi. Men joǵary bılik ókilderinen, quqyq qorǵaý organynan, bilim basqarmasynan, densaýlyq saqtaý basqarmasynan ana júregimmen ótinip suraımyn. Bul is ádil sheshimin tapsa eken. Kináliler óz jazasyn alsa eken, — dedi Aqjan Kárimova vıdeoúndeýde.
Kazinform tilshisi aqtóbelik turǵynmen baılanysyp, mán-jaıdy surady.
— Oqıǵa bolǵan kúnnen soń meni polıtsııa bólimine shaqyrdy. Biraq polıtsııa bólimine jetpeı-aq synyp jetekshisi, ata-anasy, balanyń ózi úıge kelip tur. Keshirim surady. Artynda ashýǵa berilip, men zań aıasynda sheshilýin suradym. Sebebi balanyń qolyndaǵy symdy 6 aıdan keıin alady. Ári qaraı ne bolaryn bilmeımin, — dedi Aqjan Kárim.
Osy oqıǵadan soń Qylmystyq kodekstiń «Densaýlyqqa qasaqana aýyrlyǵy ortasha zııan keltirý» baby boıynsha is qozǵaldy.
— Sotqa deıingi tergeý barysynda oqıǵanyń barlyq mán-jaıyn jáne oǵan qatysy bar tulǵalardy anyqtaý boıynsha sharalar qabyldanyp jatyr. Kúdiktiniń ata-analary balany tıisti deńgeıde tárbıeleý jónindegi mindetterin oryndamaǵany úshin jaýapqa tartylady. Kámeletke tolmaǵan mektepishilik profılaktıkalyq esepke qoıylyp, kámeletke tolmaǵandar isteri jónindegi ınspektorlardyń baqylaýyna alyndy. Polıtsııa balalardyń tárbıesine jaýapsyz qaraý jáne olardyń quqyqqa qarsy is-áreketteriniń aldyn alý boıynsha shara qoldanbaý zańmen belgilengen jaýapkershilikke ákep soǵatynyn eskertedi, — dep habarlady Aqtóbe oblystyq PD baspasóz qyzmetiniń jetekshisi Erbolat Sarqulov.
Aqtóbe oblystyq densaýlyq saqtaý basqarmasy baspasóz qyzmetiniń habarlaýynsha, bala travmatologııa bóliminde em qabyldady. Ota jasalyp, úıine shyǵarylǵan.
— Emdeý ornynda kúzet qyzmeti bar. Ata-anasy men bala patsıentpen kezdesti degen aqparat shyndyqqa janaspaıdy, — dedi Aqtóbe oblystyq densaýlyq saqtaý basqarmasynyń baspasóz qyzmeti.
Eske salsaq, Aqtóbede 14 jastaǵy jasóspirimniń óliminen soń 6 oqýshy sottaldy. Úsh oqýshy 6 jyl 8 aıǵa bas bostandyǵynan aıyryldy. Taǵy úsh oqýshy jazasyn bostandyqta júrip óteıdi.