Aqtóbelik alaıaqtarǵa aldanyp, 16 mln teńge nesıe rásimdedi

AQTÓBE. KAZINFORM — Bir emes, eki ret aldanǵan 37 jastaǵy er adam birneshe bankten nesıe aldy. Keıin ony belgisiz shotqa aýdaryp jibergen.

Aqtóbe oblystyq polıtsııa departamenti 16 mln teńge nesıe rásimdep, qaryzǵa batqan turǵynnyń oqıǵasyn aıtyp berdi. 37 jastaǵy turǵynǵa belgisiz bireý WhatsApp messendjeri arqyly habarlasqan. Ol ózin qalany elektrmen qamtamamyz etetin «Energosbyt» kompanııasynyń qyzmetkeri retinde tanystyrǵan. Sóıtip jeke derekterdi tekseretinin, ol úshin uıaly telefonǵa kelgen SMS-kodty aıtýyn suraǵan. Jábirlenýshi dál sol jolmen kodty aıtady.

— Kóp uzamaı taǵy bir adam qońyraý shalady. Bul joly ózin kıberpolıtsııa qyzmetkerimin dep tanystyrǵan. Alaıaq er adamnyń atyna nesıe rásimdelip jatqanyn aıtqan. Ony toqtatý úshin shuǵyl túrde qarama-qarsy nesıe rásimdep, qarjyny «qaýipsiz shottarǵa» aýdarý qajet ekenin túsindirgen. Alaıaqtarǵa sengen azamat birneshe bankten nesıe rásimdep, mobıldi qosymsha arqyly jalpy somasy 16 mıllıon teńgeni belgisiz shottarǵa aýdarǵan. Qazir oqıǵaǵa baılanysty tergeý amaldary júrgizilip jatyr, — dep habarlady Aqtóbe oblystyq PD baspasóz qyzmeti.

Buǵan deıin habarlaǵanymyzdaı, aqtóbelik zeınetker ınvestıtsııa salmaq bolyp, 4,7 mln teńge aqshasynan aıyryldy. Taǵy bir turǵyn áleýmettik jeli arqyly jas jigitpen tanysyp, ózine nesıe rásimdegen.