Aqtóbelikterge qajetti kómirdiń teń jartysynan astamy áli jetkizilmedi
Aqtóbe qalasynda qazan aıynyń alǵashqy kúni mektep, balabaqsha, densaýlyq saqtaý mekemelerine jylý beriledi. Al turǵyn úıler jylýǵa aıdyń orta tusynda qosylady.
«Bıyl kásiporyndar qarajaty jáne jergilikti bıýdjet esebinen kommýnaldyq ınfraqurylym nysandarynyń daıyndyq jumystary atqaryldy. Bıyl qazandyqqa, jylý jelilerine, káriz nysandary men kóppáter úılerge daıyndyq júrgizildi. Qazirgi daıyndyq 99 paıyzdy quraıdy. Naqtyraq aıtsaq, 631 qazandyqtyń 630-y daıyn. 273,9 shaqyrymdyq jylý jelisiniń 99,6 paıyzy ázir. Sý-káriz jelilerinde 89,2 shaqyrymnyń 99,5 paıyzy jóndeldi. Sonymen birge jóndeletin 82,4 shaqyrymdyq elektr jelisiniń 99 paıyzy qalpyna keltirildi», - dedi Aqtóbe oblysynyń energetıka jáne turǵyn-úı kommýnaldyq sharýashylyǵy basqarmasy basshysynyń orynbasary Darhan Tleýov.
Onyń aıtýynsha, bıýdjettik mekemeler úshin aldaǵy jylytý maýsymynda 33 455 tonna kómir qajet bolsa, onyń 99 paıyzy jetkizildi. Al 1787 tonna dızel otynynyń 1700 tonnasy jetkizilgen.
«Halyqqa 24 490 tonna kómir qajet. Onyń 8076 tonnasy ákelindi. Bul – 33 paıyz. Aqtóbege qatty otyn Shubarkól, Ekibastuz, Qarajar, Maıkóben kómir alaptarynan jetkiziledi. 41-razezde 1500 tonna kómir bar. Taǵy 20 vagon jolda. Kez kelgen ýaqytta kelip, satyp alýǵa bolady. Kómirdiń tonnasy 17 myń teńge. Baǵa ósken joq»,- dedi Darhan Tleýov.
Aıta keteıik, Aqtóbe óńiriniń basym bóligi gaz paıdalanady. Jyldyń qorytyndysy boıynsha oblystaǵy 835 myń adam nemese óńir halqynyń 93,4 paıyzy turatyn 152 eldi meken kógildir otynmen qamtylady.2022-2025 jyldar ishinde 76 eldi mekendi gazdandyrý mindeti qoıyldy. Nátıjesinde gazben qamtylǵan turǵyndardyń úlesi 97,6 paıyzǵa jetedi.
