Aqtóbelikterdiń mıllıondaryn aldap alǵan kelinshek sottaldy
AQTÓBE. QazAqparat - Aqtóbede 5 adamnyń 17 mıllıon teńgesin alaıaqtyq jolmen ıemdengen Botagóz Bıekenova sottaldy. 40 jastaǵy kelinshek 6 jyl 6 aıǵa sottalyp, raqymshylyqqa ilikti, dep habarlaıdy QazAqparat tilshisi.
Jumysqa ornalastyramyn, páter alyp beremin, joǵary oqý ornyna túsiremin degen jeleýmen birneshe adamdy aldap, 17 mıllıon teńge shyǵyndandyrǵan Botagóz Bıekenova 2016 jyldyń qarashasynda ustalǵan bolatyn. Sol kezde qalalyq ishki ister basqarmasynyń ókilderi jábirlenýshilerdi izdep, habarlandyrý berdi. Qylmystyq kodekstiń «Alaıaqtyq» baby boıynsha is qozǵalyp, «Azerı Medıkal» JShS dırektory Botagóz Bıekenovanyń 2014-2016 jyldar aralyǵynda 5 adamnan 17 mıllıon teńge alǵany belgili boldy.
Buǵan deıin habarlaǵanymyzdaı, aldanǵandardyń arasynda oblystyq densaýlyq saqtaý basqarmasy basshysynyń burynǵy orynbasary Almat Ermaǵanbetov ta bar. Ol qyzdarynyń birin Nazarbaev zııatkerlik mektebine, ekinshisin Nazarbaev ýnıversıtetine oqýǵa túsirmek bolǵan.
Búgin №2 Aqtóbe qalalyq sotynda úkim shyqty. Memlekettik aıyptaýshy «Alaıaqtyq» baby boıynsha aıyptalǵan Botagóz Bıekenovany 8 jylǵa bas bostandyǵynan aıyrýdy surady.
«Sottalýshy Botagóz Bıekenovany aıypty dep tanyp, Qylmystyq kodekstiń «Alaıaqtyq» baby boıynsha 6 jyl 6 aıǵa bas bostandyǵynan aıyrý jazasy taǵaıyndalsyn. Táýelsizdiktiń 25 jyldyǵyna oraı «Raqymshylyq týraly» Zańyn negizge alyp, jaza merziminiń teń jartysy qysqartylsyn. Sottalýshy Bıekenova 3 jyl 3 aıyn jalpy rejımdegi túzeý kolonııasynda óteıdi. Jeke múlki tárkilensin»,- dedi sýdıa A.Ádilova.
Al jábirlenýshilerdiń azamattyq aryzy tolyq qanaǵattandyryldy. Sottalýshy Bıekenova jábirlenýshilerdiń materıaldyq shyǵynyn tolyq ótegen.
Sot úkimi kúshine engen joq.
