Aqtóbelikterdi 25 jeke medıtsınalyq mekeme tegin emdeıdi
AQTÓBE. QazAqparat - Aqtóbede aýyryp em izdegender 25 jekemenshik mekemede tegin qaralady, dep habarlaıdy QazAqparat tilshisi.
Aqtóbede Medıtsınalyq saqtandyrý qorynyń fılıaly halyqqa tegin qyzmet kórsetetin emhana, aýrýhanalarmen kelisimshart jasady. Medıtsınalyq kómekti 62 mekeme kórsetedi. Onyń 37-si memlekettik, ózgesi jeke.
«2020 jyldan bastap saqtandyrylǵan adamdarǵa qymbat laboratorııalyq qyzmetter men joǵary tehnologııalyq otalar tegin usynylady. Sondaı-aq, tegin dári-dármekter de qarastyrylǵan. Shyǵynnyń bárin Áleýmettik medıtsınalyq saqtandyrý qory óteıdi. Al saqtandyrylmaǵan adamdar memleket usynyp otyrǵan tegin medıtsınalyq kómekke júgine alady. Keńes alý men dıagnostıka deńgeıinde salalyq mamandardyń, terapevttiń qyzmeti barlyǵyna tegin bolyp qalady», - deıdi fılıal dırektory Gúlmıra Qojanııazova.
2019 jyly halyqqa usynylatyn tegin medıtsınalyq kómektiń quny Aqtóbe oblysy boıynsha 39,1 mlrd teńgeni qurap otyr. Qazir 7,1 mlrd teńge medıtsınalyq mekemelerge aýdaryldy. Bıyl bólingen qarjy 4,5 paıyzǵa artty.
«Medıtsınalyq saqtandyrý júıesiniń utymdy tusy tek memlekettik medıtsınalyq uıymdar ǵana emes, sondaı-aq, jeke klınıkalar da bir-birimen báseke bolady. Byltyr halyqqa tegin qyzmet kórsetý úshin jeke emhanalar memlekettik tapsyrys ala bastady. Aqtóbe oblysynda tolyq jáne kúndizgi statsıonarda 186 myńnan astam adam em qabyldady. Sonymen qatar 23 myńnan astam aqtóbelik jeke klınıkalarda tegin emdeldi. Naýqastar statsıonarǵa jatý úshin aldymen dıagnostıkadan ótedi. Sosyn salalyq maman naýqastyń dıagnozyna baılanysty Qormen kelisimshart jasaǵan belgili bir aýrýhanaǵa joldama beredi», - dedi fılıal dırektory Gýlmıra Qojanııazova.
