Aqtóbelikter jyl basynan 140 mlrd teńgege nesıe alǵan

AQTÓBE. QazAqparat - Aqtóbedegi ekinshi deńgeıli bankter jyl basynan beri 140 mıllıard teńgege jýyq nesıe bergen. Bul ótken jyldyń sáıkes kezeńimen salystyrǵanda eki esege kóp. Nesıeniń 16 mıllıard teńgesin shaǵyn kásipkerlik sýbektileri alǵan, dep habarlaıdy QazAqparat tilshisi.

QR Ulttyq banktiń Aqtóbe oblystyq fılıaly alǵashqy jartyjyldyqty qorytyndylady.  Óńirde nesıe alýshylar qatary artyp, depozıtke qarjy saqtaıtyndar da eselengen. Teńgege basymdyq bar. Máselen, ekinshi deńgeıli bankter 140 mıllıard teńge nesıeniń 97 paıyzyn - ulttyq valıýtamen, qalǵanyn shetel valıýtasymen bergen. Nesıeniń kóbi saýda, ónerkásip, qurylys salalaryna tıesili.

«Ekinshi deńgeıli bankter nesıe berýdi jeńeldetti. Jyl basynan beri zańdy tulǵalarǵa 75,6 mıllıard teńge, jeke tulǵalarǵa 64,3 mıllıard teńge nesıe berildi. Ótken jylmen salystyrǵanda nesıe berýde ósim bar. Aqtóbe oblysy Astana men Almaty qalalaryn qospaǵanda 4-orynda keledi. Aqtóbelikter depozıtke jıi aqsha sala bastady. Jyl basynan beri 8 mıllıard teńgeni depozıtke ornalastyrdy»,- dedi QR Ulttyq banki Aqtóbe oblystyq fılıalynyń dırektory Perızat Asımbetova.

Aıta keteıik, Aqtóbede 128 valıýta aıyrbastaý orny bar. Jyl basynan beri Aqtóbedegi aıyrbastaý pýnktterinen dollardy satyp alý kólemi 19 paıyzǵa artyp, 81 mıllıon teńgeni qurady. Turǵyndar Reseı rýblin de jıi satyp alǵan. Barlyǵy 3 mıllıard teńgeden astam somaǵa rýbl satyp alyndy. ıAǵnı, óńirde turǵyndardyń shetel valıýtasyn tapsyrýy tómendep, satyp alý kórsetkishi artty.