Aqtóbelikter jóndelmegen 5 shaqyrymdyq joldy «ánge» qosty
Jyl basynda Elbasy Nursultan Nazarbaev óńir basshysy Berdibek Saparbaevty qabyldap, Aqtóbedegi joldardyń máselesin aıtqan bolatyn. Bıyl jóndeý jumystaryna bıýdjetten 7,8 mıllıard teńge bólindi. Kúrdeli, aǵymdaǵy jóndeý jumystary júrgizilip jatyr. Alaıdy birneshe jyl boıy Aqjar-Rodnıkovka baǵytyndaǵy joldardyń jaıyn aıtyp kele jatqan turǵyndardyń suranysy oryndalmaı keledi. Olar esh nátıje shyqpaǵan soń ánniń mátinin paıdalanyp, aýylǵa aparar jol beınekameraǵa túsirip alǵan. Beınematerıalda joldyń oı-shuńqyry anyq kórinip tur.
Aıta keteıik, aqtóbelik turǵyn T. Ájibaev oblys ákiminiń saıtyna arnaıy suraǵyn joldap, 2013 jyly «Aktobedorproekt» JShS jobalyq-smetalyq qujatty daıyndaǵanyn, oǵan 6 mıllıon teńge jumsalǵanyn aıtty. «Jóndeý jumystary 2014-2015 jyldary júrgizilýi tıis edi. QR Investıtsııa jáne damý mınıstrliginen, ákim blogynan kelgen jaýapta qarjy qarastyrylyp, 2016 jyly jol jóndeletin jazylǵan edi. Aqtóbe qalasynyń ákimi Іlııas Ispanov 2016 jyly jóndeý júrgiziletinin aıtty. Biraq ýáde oryndalmady»,- dep jazylǵan hatta. Arada bir jyl ótkenimen jol jóndelmedi.