Aqtóbelikter Joldaýdaǵy 10 mindetti iske asyrýǵa kiristi - Saparbaev
AQTÓBE. QazAqparat - Aqtóbede oblys aktıvi Memleket basshysy Nursultan Nazarbaevtyń «Tórtinshe ónerkásiptik revolıýtsııa jaǵdaıyndaǵy damýdyń jańa múmkindikteri» atty Joldaýyn talqylady, dep habarlaıdy QazAqparat tilshisi.
Aqtóbe Elbasy Nursultan Nazarbaevtyń «Tórtinshe ónerkásiptik revolıýtsııa jaǵdaıyndaǵy damýdyń jańa múmkindikteri» atty Joldaýynda aıtylǵan 10 mindetti oryndaýǵa kiristi. Oblys avtıvin ótkizgen óńir basshysy Berdibek Saparbaev Memleket basshysy men Úkimettiń bergen tapsyrmasy ótken jyly tolyǵymen oryndalyp, ekonomıkanyń damý qarqyny 5 paıyz kóleminde saqtalǵanyn jetkizdi. Negizgi áleýmettik-ekonomıkalyq kórsetkish 2016 jylmen salystyrǵanda joǵary bolady.
«Ótken jyly iri kompanııalar men kásiporyndar óndiristi jańǵyrtý jol kartasyna qol qoıǵan bolatyn. Aqtóbe 10 kásiporynda jańǵyrtý jumystaryn júrgizýi tıis edi. Qazirgi kezde bul jol kartasy oryndaldy. Jańa tehnologııany engizý, ınnovatsııalyq damý, tsıfrlandyrýdy ári qaraı jalǵastyramyz. Al EKSPO halyqaralyq kórmesinen keıin 18 jobany iske asyrýǵa kelisim berilgen bolatyn. Ótken jyly joba kelisimi júrip, bıyl iske asyramyz. Jańa tehnologııa engizilip, avtomattandyrý iske asyrylǵan kezde keıbir adamdardyń jumyssyz qalatyny belgili. Endi naqty taldaý jasap, qajet bolsa, adamdarǵa jańa mamandyq alýǵa kómektesý kerek»,- dedi Aqtóbe oblysynyń ákimi Berdibek Saparbaev.
Aqtóbede Elbasy Joldaýyndaǵy «Aqyldy tehnologııalar» - agroónerkásip keshenin qarqyndy damytý múmkindigi» atty úshinshi mindetti oryndap otyrǵan «Aktep», «Aıs» kompanııalary bar. Jańa tehnologııalardy engizgen kompanııalardyń tájirıbesin keń kólemde paıdalaný úshin joǵary oqý oryndary men Tájirıbe stantsııasynyń múmkindigi paıdalanylady. Al kólik-logıstıkalyq ınfraqurylymnyń tıimdiligin arttyrý mindeti ótken jyldan bastap iske asyrylyp keledi.
«Aqtóbe-Atyraý tasjolynyń qurylysy ótken jyly bastaldy. Bıyl 4 jerde qurylys jumysy júrgiziledi. Qazirgi kezde merdiger kompanııalar kelisimshartqa qol qoıdy. Jergilikti qurylys materıaly paıdalanylyp, jumysshylar osy jerden alynady. Sonymen qatar, Aqtóbe-Orsk baǵytyndaǵy joldy salý jalǵasady. Shalqar-Yrǵyz jolyn qaıta qalpyna keltirý kelisimi júrip jatyr. Úkimettiń kómegimen Aqtóbe ferrqorytpa zaýyty mańyndaǵy ótkeldiń, Ońtústik aınalma jol men Aqtóbe qalasyndaǵy eki kópirdiń qurylysy aıaqtalady»,- dedi Berdibek Saparbaev.
Bıyl aýdan, aýyl joldary da jóndeledi. Jol jóndeý jumystarymen qatar jol boıyndaǵy qyzmet kórsetý nysandarynyń da qurylysy júredi. Bıyl Aqtóbe oblysynda 20-ǵa jýyq qyzmet kórsetý beketi salynýy tıis.
