Aqtóbelikter jol salýǵa ákimdiktiń aqshasy joq degen jazýdy kóshege ilip qoıdy
AQTÓBE. QazAqparat - Aqtóbedegi Kóktem kóshesinde 30 jylǵa jýyq ýaqyttan beri turatyn Vıacheslav Medvedev «Bul kóshege ákimdiktiń aqshasy joq» dep jazyp, taqshaıshany baǵanaǵa ilip qoıdy, dep habarlaıdy QazAqparat tilshisi.
Aqtóbe qalasynyń turǵyny Vıacheslav Medvedev Kóktem kóshesine 1989 jyly kóship kelgen. Sodan beri bul kóshede jóndeý jumysy júrgizilgenin kórgen emes. Kóktem men kúzde balshyǵy ezilip, adam júrýge muń bolǵan shaqta kólikter de batpaqqa batyp qalady eken. Amaly taýsylǵan qala turǵyny «Bul kóshege ákimdiktiń aqshasy joq» dep taqtaıshaǵa jazyp, ony elektr baǵanyna shegelep qoıdy.
«Jol surap ákimdikke aryz jazyp, biz jaýabyn aldyq. Endi osy jolmen júrgen kez kelgen adam sol ákimdiktiń jaýabyn kóretin bolady. Olar bizge «Bul kósheni jóndeýge ákimdiktiń aqshasy joq» dep jaýap bergen edi. Jyl saıyn kólik qozǵalysy kóp joldar jóndelip, qalpyna keltiriledi. Al qosalqy kósheler sol kúıi ózgerissiz qala beredi. Keıde óz kúshimizben apandaı shuńqyrlardy bitegendeı bolamyz. Biraq qarapaıym adamda kóp aqsha joq ǵoı. Osy jazbadan keıin biz týraly estip, Kóktem degen kósheniń bar ekenin biletin boldy»,- dedi qala turǵyny V.Medvedev.
Aıta keteıik, Aqtóbe qalasyndaǵy joldardy jóndeýge bıyl bıýdjetten 1,5 mıllıard teńgeden astam qarjy bólingen. Qarjyǵa 34 kóshe jóndeletin boldy. Biraq bul tizimde el aýzynda júrgen Kóktem kóshesi joq. 
«Ótken jyly qaladaǵy kóshelerge qıyrshyq tas tóseý jumysy bastaldy. Bıyl bul is jalǵasady. Barlyǵy 20 kóshege tas tóseımiz. Onyń ishinde Kóktem kóshesi de bar. Bıýdjettik ótinim berip, qıyrshyq tas tóseý jumysy aıdyń aıaǵyna deıin sheshimin tabady»,- dedi qalalyq jolaýshylar kóligi jáne avtomobıl joldary bóliminiń basshysy Rýslan Tóreǵalı.
