Aqtóbelikter jol-kólik oqıǵasy kezinde qaza tapqan qyzdy aqtyq saparǵa shyǵaryp saldy
AQTÓBE. QazAqparat - Aqtóbelikter 7 shilde kúni jol-kólik oqıǵasy kezinde qaza bolǵan 19 jastaǵy Sıýzanna Gamıdovany aqtyq saparǵa shyǵaryp saldy, dep habarlaıdy QazAqparat tilshisi.
Tuńǵysh Prezıdent atyndaǵy ortalyq saıabaqta bolǵan jol-kólik oqıǵasy kezinde qaza bolǵan boıjetken Sıýzanna Gamıdovany aqtyq saparǵa shyǵaryp salý rásimine onyń ustazdary men qurdastary, tanystary jınaldy.
«Sıýzanna Gamıdova №14 orta mektepte bilim aldy. Ol óte aqyldy, alǵyr, kópshil edi. Mektepti bitirgen soń Almatyǵa oqýǵa tústi. Aqtóbege demalysqa kelgen bolýy kerek. Jas ómiri qyrshynynan qıyldy. Qaıǵy oqıǵa týraly onyń synyptastarynan estidim. Alǵashynda senbedim»,- dedi synyp jetekshisi Gúljan Súleımenova.
Aqtóbelikter jol-kólik oqıǵasyn jasap, adam ómirin qıǵan adamnyń jazaǵa tartylýy kerek dep otyr.
«Sıýzanna óte jaqsy oqydy. Tártipti qyz. Ol úlkendi syılaı biletin oqýshy boldy. Bı úıirmesine qatysyp, qoǵamdyq sharalarda belsendilik kórsetti. Sıýzannanyń jol-kólik oqıǵasy kezinde qaza bolǵany týraly synyptastary aıtty. Alǵashynda bireýi aıtyp, oǵan mán bermedim. Keıin taǵy da qaraly habar keldi. Meniń oıymsha kólik ıesi jazasyn alýy kerek»,- deıdi ustazy Jarqyn Seıtmambetova.
Buǵan deıin habarlaǵanymyzdaı , 7 maýsym kúni keshkilik 19 jastaǵy kólik júrgizýshisi Tuńǵysh Prezıdent atyndaǵy ortalyq saıabaqta serýendep júrgen boıjetkendi qaǵyp ketti. Sıýzanna Gamıdova oqıǵa ornynda mert boldy.Keıin Sıýzannanyń apasy Ekaterına Gamıdova áleýmettik jeli arqyly aqtóbelikterdi qoshtasý kúnine shaqyryp, jol-kólik oqıǵasyna jaýaptylardy beıjaı qaldyrmaıtynyn ashyq aıtty.
Aqtóbe oblystyq Іshki ister departamentiniń málimetine súıensek, 19 jastaǵy kólik júrgizýshisi ishimdik ishpegen. Qazirgi ýaqytta ol aýrýhanada em qabyldap jatyr . Birneshe medıtsınalyq-tehnıkalyq saraptama taǵaıyndaldy.
