Aqtóbelikter jańa ortalyqtyń arqasynda aqsha únemdeı alady
Energııa tıimdiligi ortalyǵynyń qurylysy 2012 jyly bastalyp, toqtap qalǵan bolatyn. 2016 jyldyń jeltoqsan aıynda respýblıkalyq nysan kommýnaldyq menshikke berildi. Qurylys jumysy qaıta jandanyp, kommýnaldyq aqyny únemdeýge múmkindik beretin nysan qoldanysqa berildi. Munda Halyqqa qyzmet kórsetý ortalyǵyn, oblystyq ІІD-niń jedel basqarý ortalyǵyn, qalanyń tirshiligin qamtamasyz etý jáne ınjenerlik jeliler monıtorıngi ortalyǵyn, sonymen qatar, Aqtóbe qalasyndaǵy Almaty aýdany ákiminiń apparatyn ornalastyrý josparlanyp otyr.
«Joba turǵyndarǵa kórsetiletin barlyq kommýnaldyq qyzmetterdi únemdeýdi qamtamasyz etý úshin júzege asyrylyp jatyr», - dedi oblys ákimi Berdibek Saparbaev.
Aıta keteıik, 10 shildede ortalyqqa synaq tártibinde №4 «Qarǵaly» turǵyn úı alaby qosylady. Keıin ózge de shaǵyn aýdandar ortalyqpen baılanystyrylady. Bul úshin úılerde málimetterdi avtomatty túrde beretin qyzmeti bar esepteý qurylǵylary ornatylýy kerek. Mamandar ortalyqtyń artyqshylyǵyna aqtóbelikter tıisti baǵasyn beredi dep senedi. Aldaǵy ýaqytta ortalyq úılerge jylý berýdi kóshedegi aýa temperatýrasyna qaraı rettep otyrady. ıAǵnı, 30 gradýs aıazda páterdegi batareıalar mınýs 5-10 gradýs kezindegige qaraǵanda ystyq bolady. Bul jylýdy shyǵyndaýǵa múmkindik bermeı, tutynýshylardyń aqshasyn únemdeıdi.
«Halyqtyń qaýipsizdigin qamtamasyz etý - ortalyqtyń taǵy bir negizgi mindetine jatady. Barlyq aýlalarda, podezderde kameralar bolýy kerek. Budan basqa, aýdan turǵyndaryna yńǵaıly bolý úshin munda memlekettik qyzmetterdiń barynsha kóp túri kórsetilýi tıis»,- dep tapsyrma berdi Berdibek Saparbaev.
Jıyn qorytyndysy boıynsha oblys ákimi jumys tobyn qurý týraly sheshim qabyldady. Olar ortalyqty tıimdi paıdalaný, turǵyn úı nysandaryn baılanysqa qosýdyń kúntizbelik josparyn jasaýy tıis.
