Aqtóbelikter jańa qurylǵan eki aýdannyń ataýyn talqylap jatyr
AQTÓBE. QazAqparat - Aqtóbe qalalyq ákimdigi jańa qurylǵan eki aýdanǵa Almaty men Astana ataýyn berýdi usyndy. Al aqtóbelikter Elek pen Sazdy ataýyn jón kórip otyr, dep habarlaıdy QazAqparat tilshisi.
Aqtóbe qalasynda eki aýdanǵa ataý berý boıynsha qoǵamdyq tyńdaý ótip jatyr. Búgin Tahaýı Ahtanov atyndaǵy drama teatr men qalalyq mádenıet úıinde halyq jınalyp, óz pikirin bildirdi. Qazirgi kezde ákimdik Almaty men Astana ataýyn jón kórip otyr.
«Aqtóbe qalasynda jańa eki aýdandy qurý bıyl 29 naýryzda talqylanyp, máslıhat depýtattary biraýyzdan sheshim qabyldady. Sońǵy on jylda qala turǵyndarynyń sany 306 myńnan 477 myń adamǵa deıin ósti. Halyqtyń jyl saıyn ósimi 10-15 myń adam bolyp otyr. Qalada shaǵyn jáne orta bıznes belsendi túrde damyp keledi. Jyl saıyn 2 myńnan astam jańa bıznes sýbektisi ashylýda. Qalada kóshelerge, eldimekenderge ataý berý boıynsha jumys toby óz qyzmetin atqaryp júr. Onyń quramyna ǵalymdar, qoǵamdyq uıym basshylary, depýtattar, ardagerler kiredi. Jańadan qurylǵan eki aýdanǵa ataý berý jumys tobynda talqylandy. Halyqtan Elek, Sazdy, Astana, Qarǵaly, Baýyrlastar, Almaty, Abaı, Ábilqaıyr han, Bókenbaı batyr degen birneshe usynys tústi. Ataýlardy saralaı kele Astana jáne Almaty ataýlaryna toqtaldy»,- dedi Aqtóbe qalasy ákiminiń orynbasary Kúlparshyn Aıdarhanova.
Aıta keteıik, usynystardy Aqtóbe qalalyq máslıhatynyń sessııasynda qaralyp, respýblıkalyq onomastıkalyq komıssııasyna jiberiledi. Keıin Aqtóbe oblystyq máslıhat sessııasynda qorytyndy sheshim qabyldanady. Biraq ákimdik usynǵan Almaty men Astana ataýyna aqtóbelikterdiń keıbiri qarsy bolyp, óz nusqasyn usyndy.
«Sazdy selolyq okrýgine baryp, halyqpen kezdestim. Turǵyndardan ártúrli usynys tústi. Qazaq batyrlarynyń atyn, Álııa Moldaǵulovaǵa ataý berý aıtyldy. Bir aqsaqal «batyrdyń atyn bersek, talas týady» dep túsindirdi. Keıin Elek pen Sazdy ataýyn berýdi aıtty. Men de halyqty qoldaımyn»,- dedi «Atameken» ulttyq kásipkerler palatasynyń Aqtóbe oblysy boıynsha sarapshysy Nurlan Mahambetov.
Al muǵalimder eki aýdannyń Almaty dep Astana ataýyn qoldady.
«Qalanyń qazirgi ósý qarqyny óte joǵary. Elden kóship ketý azaıyp, qonystanýshylar kóbeıdi. Ony mektepke deıingi, mektep oqýshylary kontıngentinen ańǵarýǵa boldy. 2013 jyly qalada 67 myń bala bolsa, 2017 jyly 96 myńǵa jetip otyr. Qala turǵyndarynyń sany 400 myńnan asty. Bul medıtsına, bilim, ishki ister qyzmetkerleriniń jumysyn kúrdelendirdi. Buryn da Aqtóbede eki aýdan boldy. Tájirıbeni paıdalana otyryp, qalany eki aýdanǵa bólgen jón. Bul 13 myń múshesi bar bilim salasynyń qyzmetkerlerinen qurylǵan kásipodaqta talqylandy. Biz Almaty men Astana ataýyn qoldap otyrmyz. Alda básekelestik kúsheıip, bilim sapasy artady dep úmittenemiz»,- dedi Aqtóbe qalalyq bilim berý salasy qyzmetkerleriniń kásipodaq tóraıymy Lıda Oralbaeva.
