Aqtóbelikter jalǵyz baspanasy órtenip ketken otbasyǵa kómektesip jatyr

Aqtóbe qalasynyń Qurylysshy baý-baýsha ujymynda úıden órt shyǵyp, balalar bir-birin aman alypshyqqan bolatyn . Eki jyl buryn qabyrǵasy qalanǵan úıdiń shatyry ortasyna túsip, Toqmambetovter 5 balasymen dalada qaldy. Órt bolyp, úıi kúlge aınalǵan habardy estigen jergilikti ákimdik arnaıy mamandary jiberip, oqıǵanyń mán-jaıymen tanysty. Keıin «Qolqanat Aqtóbe» qaıyrymdylyq qory men meshit qurylys materıaldaryn jetkizip berdi.

«Qaıyrymdy adamdar leginde shek joq. Bári balalarymyzdyń kóz jasyna qaraılasyp, kómektesken sekildi. Rahmet aıtamyz. Úıimizdiń burynǵy tastaryn qulatyp, qaıta irgetasy qalandy. Jınalǵan aqshaǵa qurylysshylardy shaqyrtyp, qabyrǵasyn qalatyp aldym. Kúz jaqyn bolǵan soń qurylysty jedeldetý kerek. Biz úıimizdi tastap, basqa jerge qona almaımyz. Sebebi, eshkim bolmasa kez kelgen zatymyz urlanyp ketedi. Al aýlamyzda qurylysqa qajetti aǵash, qıyrshyq tas, qum men shatyrǵa arnalǵan jabyndy, tipti, turmystyq tehnıkamyz bar»,- dedi Batyr Toqmambetov.

Toqmambetovterdiń balalary qazir lagerde demalyp jatyr. Baqyt, Arsen, Nurbek mektep janyndaǵy jazǵy lagerde tynyǵyp jatyr. Al Syrǵalym men Álhákim balabaqshaǵa baryp júr.

«Telefon shalyp, jaǵdaıymyzdy suraǵandarǵa qajetti zattarymyzdy aıtamyz. Qazir qujattardy qaıta qalpyna keltirip jatyrmyz. Balalardyń týý týraly kýáligi jasaldy, endi jeke kýáliktiń kelýin kútemiz. Keıin úıimizdiń qujatyn retteımiz. Qazir úıdiń aýdanyn keńeıtip saldyq. Qurylys jumystary kezinde dostarymyz, tanystarymyz kómektesti»,- dedi B.Toqmambetov.

Aıta keteıik, Aqtóbe oblysy, Mártók aýdany tońazytqysh, kir jýatyn mashına men teledıdar syıǵa tartý etken. Qala turǵyndary kıim-keshek pen azyq-túlik tasyp jatyr. «Qazir úıdiń janyndaǵy kúrkege túnep júrmiz. Tún salqyn, biraq shydaımyz. Bir aıdyń ishinde úıimizdiń qurylysyn bitirgimiz keledi. Bir adamǵa is ónbeıdi. Ózim qolymnan kelgenin jasap júrmin. Aqysyz demalys aldym, qujattarymdy rásimdeýmen ýaqyt ótip jatyr»,- dedi B.Toqmambetov.