Aqtóbelikter jalǵan lıtsenzııa jasap, óndiris oryndaryn satýmen aınalysqan
AQTÓBE. QazAqparat -Aqtóbede jyl basynan beri QR Memlekettik qyzmet isteri jáne sybaılas jemqorlyqqa qarsy is-qımyl agenttigine qarasty Sybaılas jemqorlyqqa qarsy kúres boıynsha ulttyq bıýrosynyń oblystyq departamenti 100-den astam isti tergep, teń jartysyn sotqa jiberdi. Qazirgi kezde 16 adamǵa qatysty qylmystyq iske úkim shyqty, dep habarlaıdy QazAqparat tilshisi.
Aqtóbe oblysynda sybaılas jemqorlyq deregi úsh ese artyp otyr. Basty sebep - úsh jeke tulǵaǵa qatysty 22 epızodtyń anyqtalǵany. ıAǵnı, úsh aqtóbelik 2015-2017 jyldar aralyǵynda jumys istemeı turǵan kompanııalardy satyp alyp, qurylys mekemesine jalǵan qujattardy tapsyrady. Sol arqyly qurylys júrgizýge ruqsat beretin lıtsenzııalardy rásimdep, keıin sol kompanııalardy basqa adamdarǵa satyp jibergen.
«Bul jerde qujat rásimdeýge ruqsat bergen qurylys bólimi zań boıynsha jaýapqa tartylmaıdy. Sondyqtan Ulttyq bıýronyń oblystyq departamenti Qurylys komıtetine zańnamalarǵa ózgertýler men tolyqtyrýlar engizý týraly usynys joldady. Jalpy Aqtóbe oblysynda birinshi toqsanda 50 qylmystyq is sotqa jiberildi. Onyń 76 paıyzy jemqorlyq deregi. Jalpy shyǵyn 159 mıllıon teńgeni qurap otyr. Densaýlyq saqtaý, aýyl sharýashylyǵy, ádilet departamenti, bilim salasy, ishki ister organdarynyń qyzmetkerleri jaýapqa tartyldy. Máselen, ІІD Temir aýdandyq ishki ister bólimi bastyǵynyń orynbasary T.Abdýllın qyzmettik ókilettiligin asyra paıdalanyp A.Tajenovten 350 myń teńge aqsha alǵan. Ol quqyq qorǵaý organdaryna jumysqa ornalastyrý úshin medıtsınalyq komıssııadan ótkizip, dene jattyǵýy daıyndyǵy kezinde kómektesýge ýáde bergen. Qazirgi kezde aıyptalýshy T. Abdýllınge úsh jyl alty aıǵa bas bostandyǵynan shekteý jazasy taǵaıyndaldy. Ol ómir boıy quqyq qorǵaý salasynda laýazymdyq qyzmet atqara almaıdy»,- dedi Ulttyq bıýronyń oblystyq departament bastyǵynyń orynbasary Kamal Qabylbekov.
Buǵan deıin habarlaǵanymyzdaı, Muǵaljar aýdandyq ishki ister bóliminiń aǵa memlekettik kólik ınspektory Nurdáýlet Sarshın júrgizýshi kýáliginen aıyrylǵan adamdardyń ornyna emtıhan tapsyryp, isti bolǵan. Oǵan da eki jyl bas bostandyǵyn shekteý jazasy taǵaıyndaldy.
