Aqtóbelikter úılerin sý basqan turǵyndarǵa kómektesip jatyr

AQTÓBE. QazAqparat - Aqtóbelikter baspanasy sý astynda qalǵan adamdarǵa zattaı, qarjylaı kómektesip jatyr. Qaıyrymdylyq aktsııasyn «Nur Ǵasyr» meshitiniń janyndaǵy qor uıymdastyrdy, dep habarlaıdy QazAqparat tilshisi.  

Aqtóbe qalasyndaǵy eriktiler birneshe top quryp, qaıyrymdylyq aktsııasyn uıymdastyryp jatyr. «Nur Ǵasyr» meshiti janyndaǵy «Zeket» qory keshe áleýmettik jeli arqyly habarlandyrý berip, kópshilikke úndeý tastady.
 

«Sý basqan úılerdi qarap, adamdarmen sóılesip keldik. Keıin olarǵa kómektesý qajet degen sheshim qabyldandy. Biz taza, bútin kıim-keshek pen turmystyq zatardy, azyq-túlikti qabyldaımyz. Qaıyrymdy adamdar qarjy jınap berip jatyr»,-  dedi «Zeket» qorynyń ókili Ómirbek Dámen. Qor músheleri búgin úzilissiz jumys isteıdi. Keshkilik bar jınalǵan múlikti arnaıy shtabqa tapsyrady. «Biz týraly estip, baspanasy sýǵa ketip jatqan adamdar meshit janyndaǵy qorǵa kelip jatyr. Olarǵa kómek kórsetiledi. Sonymen qatar, elimizdiń ár óńirinen habarlasyp, aqsha aýdarý úshin esepshot nómirin suraıtyndar bar»,- dedi Ó. Dámen.

Buǵan deıin habarlaǵanymyzdaı, baspanasy sýǵa ketken aqtóbelikter qazir mektepterdi panalap otyr. Onda 600-ge jýyq adam bar. Keıbiri tek qujattaryn alyp úlgerse, ózgesi úı kıimimen janyn saqtap shyqqan.