Aqtóbelikter Túrkistan oblysyna 50 tonna azyq-túlik jóneltti

AQTÓBE. QazAqparat - Sýdan zardap shekken Túrkistan oblysynyń Maqtaaral aýdanyna Aqtóbeden 50 tonna azyq-túlik pen qajetti zattar jiberildi, dep habarlaıdy QazAqparat tilshisi.

Úlken júk kóligi men 20 «GAZel»-ge tıelgen gýmanıtarlyq júk jolǵa shyqty.

Aqtóbe qalasy men Shalqar, Yrǵyz, Alǵa aýdandarynyń qarapaıym turǵyndary, kásipkerler, memlekettik mekeme qyzmetshiler men volonterler birneshe kún boıy Túrkistan oblysynyń Maqtaaral aýdanyna jóneltiletin júkti jınady.

«Nur Otan» partııasynyń qalalyq fılıaly men volonterler arasynda kelisim jasalyp, halyq ákelgen zattar júk kóligine meshit janynda tıeldi. Keıbir eriktiler azyq-túlik, kıim men turmystyq zattardy turǵyndardyń úılerinen jınady.

«Apat aıtyp kelmeıdi. Mundaıda biz bir bolyp, qıyndyqty eńserýimiz kerek. Júkti jınap, tıep, ony jetkizýge kómektesip jatqan adamdarǵa alǵys aıtamyz», - dedi «Nur Otan» partııasy oblystyq fılıalynyń birinshi orynbasary Erbol Danaǵulov.
Málim etilgendeı, blokpostardan ótý úshin qujattar aldyn ala ázirlendi.

Gýmanıtarlyq júkti partııanyń qalalyq fılıaly tóraǵasynyń birinshi orynbasary Nurlybek Júsipov bastap barady.

Aıta keteıik, sonymen birge aqtóbelikter maqtaaraldyqtarǵa kómek retinde birkúndik jalaqylaryn aýdaryp jatyr.