Aqtóbelikter Tóreǵalı men Erkeni sahnada únsiz qaldyrdy
AQTÓBE. QazAqparat - Aqtóbede qurylysshylardy kásibı merekelerimen quttyqtaýǵa sahna juldyzdary Tóreǵalı Tóráli men Erke Esmahan shaqyryldy. Merekege halyq kóp jınalyp, yryqqa kónbegen tyńdarmandar sahnaǵa lap qoıdy, dep habarlaıdy QazAqparat tilshisi.
Qurylysshylar kúni Aqtóbede shaǵyn saıabaq ashylyp, eńbekkerlerge eskertkish tas qoıyldy. Aqtóbe oblysynyń ákimi Berdibek Saparbaev mereke ıelerin quttyqtap, alǵysyn bildirdi.
«Aqtóbelik qurylys kompanııalary kóktemgi sý tasqyny kezinde baspanasy qırap, jaramsyz kúıge túsken óz jumysshylaryna páter berdi, ózgelerge kómektesti. Óńir basshylyǵy atynan qurylysshylarǵa alǵys aıtamyn. Bizdiń qurylysshylarymyz memlekettik baǵdarlamalardy iske asyrýda tabandylyq tanytyp júr»,- dedi oblys ákimi. Keıin qurylysshylar tósbelgilermen, alǵys hattarmen marapattaldy.
Aıta keteıik, qurylysshylar kúnine Tóreǵalı Tóráli men Erke Esmahan arnaıy shaqyrylyp, habarlandyrý áleýmettik jeli arqyly berilgen bolatyn. Keshkelik Tuńǵysh Prezıdent atyndaǵy ortalyq saıabaqqa jınalǵan halyq qarasy kóp boldy. Tóreǵalıdiń birneshe áninen soń onyń kishkentaı tyńdarmandary sýretke túsip, keıin sahnaǵa shyǵyp ketti. Lap qoıǵan kezde tehnıka isten shyǵyp, Tóreǵalı men Erke birneshe mınýt sahnada únsiz turdy. Súıikti ánshilerin kórýge barǵan aqtóbelikter keıin bir-birin ıterip, balalar ata-analaryn joǵaltyp aldy. Tóreǵalı aqtóbelikterdi sabyrǵa shaqyra bastady.
