Aqtóbelikter stadıon ornyna úı salýǵa ruqsat bergen ákimdik ókilderin raıynan qaıtardy
AQTÓBE. QazAqparat – Aqtóbede 11 shaǵynaýdan turǵyndary ákimdiktiń sheshimimen kelispedi. Stadıon ornyna turǵyn úı salmaq bolǵan kásipkerge qarsylyq bildirgen olar óz oılaryn ashyq bildirdi, dep habarlaıdy QazAqparat tilshisi.
Aqtóbe qalasy 11 shaǵyn aýdan turǵyndary «kópqabatty úı aýlasyndaǵy shaǵyn stadıonǵa taǵy úı salamyz» degen eskertýdi estigen kezde qarsylyq bildirdi. Olar bul habardy qurylys kompanııasynan bilip, abdyrap qalmaı, jınalyp, óz oılaryn ashyq aıtty.
«Qala ákimdigi zeınetkerlerge arnap saýyqtyrý ortalyqtaryn ashty. Biraq barar jer alys. Sondyqtan biz úı mańyndaǵy stadıonǵa kelemiz. Osynda júremiz, serýendeımiz. Kútimi nashar bolsa da bul alań bizdiń tynyǵatyn ornymyz. Munda adam kóp, al demalys orny joq. Ózimiz, balalarymyz, nemerelerimiz úshin alańdy saqtap qalǵymyz keledi»,- dedi qala turǵyny Qarashash Óksikbaeva.
Aıta keteıik, bul shaǵyn aýdanda orta mektep te bar. Oqýshylar da dene shynyqtyrý páninde shyǵyp, júgiredi.
«Sportshylar, balalar, eresekter de osy jerde sportpen shuǵyldanady. Muny bári kórip júr. Sport alańyna turǵyn úı salý durys emes», - qala turǵyny Gúlnar Temirjanova.
Turǵyndardyń narazylyǵyn estilegen Aqtóbe qalalyq ákimdigi sheshimdi qaıta qarap shyqty.
«Bul jer qala menshiginde boldy. Keıin «Nektar» óndiristik kooperatıviniń jeke menshigine berildi. Sol kezde qalalyq sáýlet, qala qurylysy bóliminiń basshysy kelip, bul týraly turǵyndarǵa túsindirgen. Turǵyndar óz qarsylyǵyn bildirgen soń qala ákimdigi «Nektar» óndiristik kooperatıvi basshysymen qaıta kelissóz júrgizdi. Kelisim jasaldy. Úı salynbaıdy. Jer ýchaskesi qalaǵa qaıtarylady. Bir aptada sheshimi shyǵady», - Aqtóbe qalalyq jer qatynastary bóliminiń bas mamany Jánibek Qabylov.
