Aqtóbelikter sasyq ıisten qutylatyn boldy
AQTÓBE. QazAqparat - Aqtóbelik ekologtar ótken jyly sasyq ıispen kúresip, birqatar jumys júrgizildi, dep habarlaıdy QazAqparat tilshisi.
Aqtóbe qalasynyń ekologııalyq ahýaly ótkir máselege aınaldy. Ótken jyly oblys ákimi Berdibek Saparbaev aýadaǵy sasyq ıisti ketire almaǵan ekologtarǵa sol aımaqqa baryp turýdy usyndy. Sebebi, qala turǵyndary kúkirtti sýtekten allergııa dertine shaldyqqqan bolatyn. Al bıyl arnaıy jospar qurylyp, ıisti joıý úshin aǵyndy sýǵa bakterııalar jiberý usynylyp otyr.
«Ótken jyly aýany lastaýdyń 144 deregi anyqtaldy. Sonymen qatar, 2016-2017 jyldary jaǵymsyz ıistiń kózin anyqtaý jumystary júrgizildi. Zertteý kezinde jaǵymsyz ıistiń shyǵý jerleri belgili boldy. Birinshiden, káriz qudyqtary men onyń jan-jaǵyndaǵy lastanǵan zattar, ekinshiden spırt óndirisinen qalǵan qaldyqtar jıyntyǵy. Aqtóbe qalasynyń ákimdigi men qalany sýmen qamtamasyz etip otyrǵan «Aqbulaq» AQ jumysqa kiristi. Iisti zalalsyzdandyrý jumystary júrip jatyr»,- dedi Aqtóbe oblystyq ekologııa departamentiniń basshysy Jaqsyǵalı Imanqulov.
Qazir Aqtóbe qalasynda las sýlar jınaıtyn 53 káriz sorǵylaý stantsııasy bar. Munda kún saıyn 5 myńǵa jýyq kásiporyn qaldyq sý quıyp otyr. Jergilikti kommýnaldyq mekeme káriz sýyn tazartý, ıisti joıý tehnologııalaryn meńgerý úshin óz mamandaryn Reseıdiń Podolsk qalasyna jiberdi. Bıyl kázir quryqtaryna súzgiler qoıý, arnaıy bakterııalar jiberý jumysy júrgiziledi.
