Aqtóbelikter óz qoldaýyn bildirgen beınerolıkti Golovkınniń jankúıerlerine joldady

AQTÓBE. QazAqparat - Aqtóbedegi 25 qabatty úıde «GGG Aqtóbe verıt v pobedý!» rolıgi kórsetilip jatyr. Qalany jaryqtandyrýshylar túngi kórinisti áleýmettik jelige tirkep, Golovkınniń jankúıerleri arqyly sálemdemeni berip jibergen, dep habarlaıdy QazAqparat tilshisi.

Aqtóbe qalasyndaǵy 25 qabatty turǵyn úıdiń qasbeti jaryqtandyrylyp, saǵat 22:00-2:00 aralyǵynda túrli túske boıalyp júr. Jaryqtandyrý kompanııasy taıaýda «GGG Aqtóbe verıt v pobedý!» rolıgin daıyndap, iske qosqan.

«Gennadıı Golovkındi qoldap, arnaıy óz lebizimizdi jetkizdik. Aldaǵy ýaqytta qalada bolyp jatqan is-sharalardy qamtyp, memlekettik merekelerde quttyqtaý arnaımyz. «Aqtóbe» fýtbol komandasyn qoldap, tolyqqandy ekrandy utymdy paıdalanýdy maqsat ettik»,- dedi jaryqtandyrý kompanııasynyń dırektory Ulan Qozybaqov. 

Jańa ıdeıa avtorlary túngi kórinisti beınege túsinip, boksshy Gennadıı Golovkınge jibergen. «Aqtóbelikter Las Vegasqa baryp, Golovkın men Alvarestiń jekpe-jeginde boksshymyzǵa qoldaý kórsetedi. Biz jankúıerler arqyly óz beınerolıgimizdi berip jiberemiz. Negizi áleýmettik jelige salyp, oǵan belgi berdik. Aldaǵy kúnderi qoldaýymyzdy qazaq tilinde de jetkizemiz»,- dedi Ulan Qozybaqov.

Aıta keteıik, aldaǵy ýaqytty aqtóbelikter 25 qabatty turǵyn úıdiń qasbetinde birneshe quttyqtaýlar men qanatty sózderdi tamashalaı alady. Elbasynyń «Aqtóbe - qutty meken» sózi de jazylatyn bolady.